தமிழகத்தில் பிளஸ் 2 மாணவர்களுக்கான பொதுத்தேர்வு முடிவுகள் வெளியாக உள்ள நிலையில், என்ஜினீயரிங் படிப்புகளில் சேருவதற்கான விண்ணப்பப் பதிவு எப்போது தொடங்கும் என்பது குறித்த முக்கிய அறிவிப்பைத் தொழில்நுட்பக் கல்வி இயக்ககம் (DOTE) வெளியிட்டுள்ளது.
தமிழகத்தில் பிளஸ் 2 பொதுத்தேர்வு முடிவுகள் வரும் மே 8-ஆம் தேதி வெளியாகவுள்ளன. இதனைத் தொடர்ந்து, அண்ணா பல்கலைக்கழகத்தின் கீழ் இயங்கும் பொறியியல் கல்லூரிகளுக்கான மாணவர் சேர்க்கை (TNEA 2026) பணிகளைத் தொழில்நுட்பக் கல்வி இயக்ககம் ஆன்லைன் வாயிலாகத் தொடங்கவுள்ளது. இதற்கான அதிகாரப்பூர்வ விண்ணப்பப் பதிவு மே மாதம் 2-வது வாரத்தில் தொடங்கும் என அறிவிக்கப்பட்டுள்ளது. மாணவர்கள் தங்களது மதிப்பெண் சான்றிதழ்கள் மற்றும் இதர ஆவணங்களுடன் ஆன்லைன் மூலம் விண்ணப்பிக்கத் தயாராக இருக்குமாறு அறிவுறுத்தப்பட்டுள்ளனர்.
பொறியியல் படிப்பில் சேர விரும்பும் மாணவ, மாணவியர் மற்றும் அவர்களது பெற்றோர்கள் கூடுதல் விவரங்களுக்கு www.tneaonline.org என்ற அதிகாரப்பூர்வ இணையதளத்தைத் தொடர்ந்து பார்வையிடுமாறு கேட்டுக் கொள்ளப்பட்டுள்ளனர். விண்ணப்பப் பதிவு, ரேங்க் பட்டியல் வெளியீடு மற்றும் கலந்தாய்வு தேதிகள் குறித்த முழுமையான அட்டவணை விரைவில் இந்த இணையதளத்தில் பதிவேற்றப்படும்.
கடந்த ஆண்டைப் போலவே இந்த ஆண்டும் கவுன்சிலிங் முழுமையாக ஆன்லைன் முறையிலேயே நடைபெறும் என்பதால், கிராமப்புற மாணவர்கள் வசதிக்காக மாவட்ட வாரியாகத் ‘தமிழ்நாடு பொறியியல் சேர்க்கை உதவி மையங்கள்’ (TFC) செயல்படும் எனவும் எதிர்பார்க்கப்படுகிறது.
