சென்னை அருகே முட்டுக்காட்டில் செயல்பட்டு வரும் ஒன்றிய அரசின் தேசிய மாற்றுத்திறனாளிகள் மேம்பாட்டிற்கான நிறுவனத்தில் ஒப்பந்த தொழிலாளர்கள் திடீர் வேலை நீக்கத்திற்கு எதிர்ப்பு தெரிவித்து போராட்டத்தில் ஈடுபட்ட சம்பவம் பரபரப்பை ஏற்படுத்தியுள்ளது. தொழிலாளர்களின் போராட்டத்தை தொடர்ந்து நிர்வாகம் தற்காலிகமாக வேலை நீக்க உத்தரவை திரும்பப் பெற்றுள்ளது.
முட்டுக்காட்டில் இயங்கி வரும் இந்த தேசிய நிறுவனம், பல்வேறு வகையான மாற்றுத்திறனாளிகளுக்கான சிகிச்சை, பயிற்சி மற்றும் மறுவாழ்வு சேவைகளை வழங்கி வருகிறது. மூளை வளர்ச்சி குறைபாடு, கை மற்றும் கால் செயலிழப்பு, காது கேளாமை, பேச்சு குறைபாடு உள்ளிட்ட பல்வேறு சவால்களை எதிர்கொள்ளும் நபர்களுக்கு இங்கு சிறப்பு சேவைகள் வழங்கப்படுகின்றன. சிகிச்சை பெறும் நபர்கள் மற்றும் அவர்களது குடும்பத்தினர் தங்கும் வசதிகளும் இந்நிறுவனத்தில் ஏற்படுத்தப்பட்டுள்ளன.
இந்த நிறுவனத்தில் 23 நிரந்தர ஊழியர்கள் பணியாற்றி வரும் நிலையில், மருத்துவ உதவியாளர்கள், துப்புரவு பணியாளர்கள், பிளம்பர்கள், எலக்ட்ரீஷியன்கள், தோட்டப் பராமரிப்பு ஊழியர்கள் உள்ளிட்ட 250-க்கும் மேற்பட்டோர் ஒப்பந்த அடிப்படையில் நீண்டகாலமாக பணியாற்றி வருகின்றனர்.
இந்நிலையில், கடந்த சில நாட்களாக 138 ஒப்பந்த தொழிலாளர்களை பணிக்கு வர வேண்டாம் என நிர்வாகம் அறிவித்ததாக கூறப்படுகிறது. இதனால் அதிர்ச்சியடைந்த தொழிலாளர்கள், தங்களை பணி நிரந்தரம் செய்ய வேண்டும் மற்றும் தொடர்ந்து வேலை வாய்ப்பு வழங்க வேண்டும் என கோரி பல்வேறு அதிகாரிகளுக்கு மனுக்கள் அனுப்பியிருந்தனர்.
ஆனால், தங்களது கோரிக்கைகளுக்கு எந்த பதிலும் கிடைக்காததால், நேற்று காலை நூற்றுக்கும் மேற்பட்ட தொழிலாளர்கள் நிறுவன நுழைவாயிலில் அமர்ந்து போராட்டத்தில் ஈடுபட்டனர். நிர்வாகத்திற்கு எதிராக கோஷங்களை எழுப்பிய அவர்கள், வேலை நீக்க முடிவை திரும்பப் பெற வேண்டும் என வலியுறுத்தினர்.
போராட்டத்தின் காரணமாக சிகிச்சைக்காக வந்த நோயாளிகள் மற்றும் அவர்களது பெற்றோர்களும் பாதிக்கப்பட்டனர். பின்னர் அவர்கள் கூட தொழிலாளர்களுக்கு ஆதரவாக குரல் கொடுத்தனர். சிலர் கிழக்கு கடற்கரை சாலையில் மறியல் செய்ய முயன்றதால் அப்பகுதியில் பதற்றமான சூழ்நிலை நிலவியது.
இதையடுத்து நிறுவனத்தின் கூடுதல் பதிவாளர் சந்தோஷ்கண்ணா மற்றும் காவல்துறை உதவி ஆணையர் ரவி அபிராம் ஆகியோர் போராட்டக்காரர்களுடன் பேச்சுவார்த்தை நடத்தினர். நீண்ட ஆலோசனைக்குப் பிறகு, வேலை நீக்க உத்தரவு தற்காலிகமாக ரத்து செய்யப்பட்டு அனைத்து தொழிலாளர்களும் மீண்டும் பணிக்கு வரலாம் என அறிவிக்கப்பட்டது.
மேலும், தொழிலாளர்களின் கோரிக்கைகள் குறித்து உயர் அதிகாரிகளுடன் ஆலோசனை நடத்தி அடுத்தகட்ட முடிவுகள் எடுக்கப்படும் என்றும் உறுதியளிக்கப்பட்டது. இதையடுத்து தொழிலாளர்கள் போராட்டத்தை கைவிட்டு பணிக்குத் திரும்பினர்.
