கோடை வெயிலின் தாக்கம் நாளுக்கு நாள் அதிகரித்து வரும் நிலையில், தமிழகத்தின் பெரும்பாலான வீடுகளில் ஏசிகளின் பயன்பாடு தவிர்க்க முடியாததாகிவிட்டது. ஆனால், ஏசியைப் பயன்படுத்தும்போது வரும் மின்சாரக் கட்டணம் பலருக்கும் தூக்கத்தைக் கெடுப்பதாக உள்ளது. உங்கள் வீட்டின் மின்கட்டணத்தை லாவகமாகக் குறைக்க ஏசியை எப்படிச் சரியாகப் பயன்படுத்துவது என்பது குறித்து நிபுணர்கள் வழங்கும் ஆலோசனைகள் இதோ:
பலரும் அறை சீக்கிரம் குளிர வேண்டும் என்பதற்காக ஏசியை 16 அல்லது 18 டிகிரியில் வைப்பார்கள். ஆனால், நிபுணர்களின் கருத்துப்படி ஏசியை 24 டிகிரி செல்சியஸில் வைப்பதே மிகச்சிறந்தது. ஏசியின் வெப்பநிலையை நீங்கள் ஒவ்வொரு டிகிரி குறைக்கும் போதும் (உதாரணமாக 24-லிருந்து 23-க்கு), சுமார் 6 சதவீத மின்சாரம் கூடுதலாகச் செலவாகும் என்பது குறிப்பிடத்தக்கது. எனவே, 24 டிகிரியில் வைப்பதன் மூலம் கணிசமான மின்சாரத்தைச் சேமிக்க முடியும்.
ஏசி ஓடும்போது சீலிங் ஃபேனை (Ceiling Fan) குறைந்த வேகத்தில் இயக்குவது ஒரு புத்திசாலித்தனமான நுட்பம். சீலிங் ஃபேன் ஏசியிலிருந்து வெளிவரும் குளிர்ந்த காற்றை அறையின் அனைத்துப் பகுதிகளுக்கும் சீராகப் பரவச் செய்யும். இதனால் அறை விரைவில் குளிர்ச்சியடைவதுடன், ஏசி கம்ப்ரஸர் (Compressor) அதிக நேரம் வேலை செய்வதையும் தவிர்க்கலாம்.
இரவு நேரங்களில் தூங்கும்போது ஏசியில் உள்ள ‘ஸ்லீப்’ (Sleep) வசதியைப் பயன்படுத்தத் தவறாதீர்கள். இது நீங்கள் தூங்கிய பிறகு அறையின் வெப்பநிலையை மணி நேரத்திற்கு ஒருமுறை மெதுவாக அதிகரிக்கும். இதனால் நள்ளிரவில் அதிகப்படியான குளிர் ஏற்படுவது தவிர்க்கப்படுவதுடன், மின்சாரமும் பெருமளவு மிச்சமாகும்.
நீங்கள் ஒரு புதிய ஏசி வாங்கத் திட்டமிட்டிருந்தால், 5 நட்சத்திர மதிப்பீடு (5-Star Rating) கொண்ட ஏசி அல்லது இன்வெர்ட்டர் ஏசிகளை (Inverter AC) வாங்குவது சிறந்தது. சாதாரண ஏசிகளை விட இன்வெர்ட்டர் ஏசிகள் அறை வெப்பநிலைக்கு ஏற்பத் தனது திறனைத் தானாகவே மாற்றிக்கொள்ளும் தன்மை கொண்டவை என்பதால், இவை நீண்ட கால அடிப்படையில் மின்கட்டணத்தைக் குறைக்க உதவும்.
