சென்னை தாம்பரம் அருகே அரசு பேருந்தில் நடந்த அதிர்ச்சி சம்பவத்தில், முதியவர் ஒருவர் தாக்கப்பட்டு உயிரிழந்தார். கூடுவாஞ்சேரியிலிருந்து வடபழனி நோக்கிச் சென்ற அரசு பேருந்தில் சந்திரசேகரன் என்ற முதியவர் தனது மனைவியுடன் பயணம் செய்து கொண்டிருந்தார். அப்போது தாம்பரம் பகுதியில் அமர்நாத் என்ற நபர் பேருந்தில் ஏறினார்.
பேருந்து எங்கு செல்கிறது என கேட்டதிலிருந்து ஏற்பட்ட சச்சரவால் இருவருக்கும் வாக்குவாதம் ஏற்பட்டதாக கூறப்படுகிறது. வாக்குவாதம் தீவிரமடைந்த நிலையில், அமர்நாத் திடீரென முதியவரை தாக்கியுள்ளார். இந்த தாக்குதலில் சந்திரசேகரன் கடுமையாக காயமடைந்து, பின்னர் உயிரிழந்தார்.
சம்பவத்தால் அதிர்ச்சியடைந்த சக பயணிகள் உடனடியாக அமர்நாத்தை பிடித்து போலீசாரிடம் ஒப்படைத்தனர். தகவல் அறிந்த போலீசார் சம்பவ இடத்துக்கு வந்து, வழக்குப் பதிவு செய்து விசாரணை தொடங்கினர். இந்த சம்பவம் பொதுமக்களிடையே பெரும் பதற்றத்தையும் கவலையையும் ஏற்படுத்தியுள்ளது.
பொது போக்குவரத்தில் பாதுகாப்பு ஏற்பாடுகள் வலுப்படுத்தப்பட வேண்டும் என்ற கோரிக்கையும் எழுந்துள்ளது.
