செங்கல்பட்டு மாவட்டம் திம்மாவரம் பகுதியில் கடந்த இரண்டு நாட்களாக தெருநாய் தாக்குதல் சம்பவங்கள் அதிகரித்து வருவது பொதுமக்களிடையே பெரும் அச்சத்தை ஏற்படுத்தியுள்ளது. குறிப்பாக ஒரு தெருநாய் வெறித்தனமாக நடந்து கொண்டு, இதுவரை 7 பேரை கடித்து காயப்படுத்தியுள்ளது.
நேற்று மகாலட்சுமி நகர் பகுதியில் வசிக்கும் தினேஷ் குமார் மற்றும் ஹரிகிருஷ்ணன் ஆகிய இருவரையும் அந்த நாய் தாக்கியதாக கூறப்படுகிறது. திடீரென நடந்த இந்த தாக்குதலால் அவர்கள் காயமடைந்து அருகிலுள்ள மருத்துவமனையில் சிகிச்சை பெற்று வருகின்றனர். அப்பகுதியில் இருந்த பொதுமக்கள் உடனடியாக செயல்பட்டு, அந்த நாயை அடித்து துரத்தியுள்ளனர்.
இந்த சம்பவங்களால் அந்த பகுதி மக்கள் மிகுந்த பயத்தில் உள்ளனர். குறிப்பாக பெண்கள் மற்றும் குழந்தைகள் வெளியில் செல்ல தயக்கம் காட்டுகின்றனர். தொடர்ந்து நடைபெறும் இந்த தாக்குதல்களை கட்டுப்படுத்த உடனடி நடவடிக்கை எடுக்க வேண்டும் என்று பொதுமக்கள் அதிகாரிகளிடம் கோரிக்கை விடுத்துள்ளனர்.
நகராட்சி நிர்வாகம் மற்றும் விலங்குகள் பாதுகாப்பு குழுக்கள் இணைந்து, தெருநாய்களை கட்டுப்படுத்தும் நடவடிக்கைகளை தீவிரப்படுத்த வேண்டும் என சமூக ஆர்வலர்கள் வலியுறுத்தியுள்ளனர்.
