தமிழகம் உட்பட 5 மாநிலங்களில் நடைபெற்ற சட்டமன்றத் தேர்தலின் வாக்கு எண்ணிக்கை மே 4-ஆம் தேதி காலை 8 மணிக்குத் தொடங்கும் எனத் தேர்தல் ஆணையம் அதிகாரப்பூர்வமாக அறிவித்துள்ளது.
தமிழகம் உள்ளிட்ட 5 மாநிலங்களில் விறுவிறுப்பாக நடைபெற்று முடிந்த சட்டமன்றத் தேர்தலுக்கான வாக்கு எண்ணிக்கை குறித்த முக்கிய அறிவிப்பை இந்தியத் தேர்தல் ஆணையம் வெளியிட்டுள்ளது. இதன்படி, வரும் மே 4-ஆம் தேதி காலை 8 மணி முதல் வாக்கு எண்ணிக்கை தொடங்கும் என அறிவிக்கப்பட்டுள்ளது.
தமிழகத்தில் கடந்த ஏப்ரல் 23-ஆம் தேதி ஒரே கட்டமாகச் சட்டமன்றத் தேர்தல் நடைபெற்றது. இதனைத் தொடர்ந்து கேரளா, புதுச்சேரி, மேற்கு வங்கம் மற்றும் அசாம் ஆகிய மாநிலங்களிலும் தேர்தல் பொதுத்தேர்தல் பணிகள் நிறைவடைந்துள்ளன. வாக்குப்பதிவு முடிவடைந்த நிலையில், அனைத்து வாக்கு இயந்திரங்களும் (EVM) பலத்த பாதுகாப்புடன் அந்தந்த மாவட்டங்களில் உள்ள ‘ஸ்ட்ராங் ரூம்’ (Strong Room) எனப்படும் பாதுகாப்பு அறைகளில் வைக்கப்பட்டுள்ளன. வாக்கு எண்ணும் மையங்களில் மூன்றடுக்கு போலீஸ் பாதுகாப்பு போடப்பட்டுள்ளதுடன், சிசிடிவி கேமராக்கள் மூலம் 24 மணி நேரமும் தீவிரமாகக் கண்காணிக்கப்பட்டு வருகிறது.
மே 4-ஆம் தேதி காலை 8 மணிக்கு முதலில் ‘தபால் வாக்குகள்’ (Postal Ballots) எண்ணப்படும். அதனைத் தொடர்ந்து 8:30 மணி முதல் மின்னணு வாக்கு இயந்திரங்களில் பதிவான வாக்குகள் எண்ணப்படும் எனத் தேர்தல் ஆணையம் தெரிவித்துள்ளது. காலை 10 மணிக்கே முன்னிலை நிலவரங்கள் தெரியவரும் என்பதால், 5 மாநிலங்களிலும் யாருடைய ஆட்சி அமையப்போகிறது என்ற எதிர்பார்ப்பு இப்போதே உச்சக்கட்டத்தை எட்டியுள்ளது. குறிப்பாகத் தமிழகத்தில் திமுக-அதிமுக கூட்டணிகளுக்கு இடையே கடும் போட்டி நிலவும் சூழலில், தேர்தல் முடிவுகள் அரசியல் களத்தில் பெரும் மாற்றங்களை ஏற்படுத்தும் என எதிர்பார்க்கப்படுகிறது.
