தமிழகத் தேர்தல் 2026: விதிமீறினால் 2 ஆண்டுகள் சிறை! – வெளியூர் நபர்கள் வெளியேற உத்தரவு!

தமிழகச் சட்டமன்றத் தேர்தலுக்கான இறுதிக்கட்டப் பிரச்சாரம் நாளை (ஏப்ரல் 21) மாலை 6 மணியுடன் நிறைவடைகிறது. அதன்பின்னர் வாக்குப்பதிவு முடியும் வரை கடைப்பிடிக்க வேண்டிய மிகக் கடுமையான விதிமுறைகளைத் தமிழகத் தலைமைத் தேர்தல் அதிகாரி அர்ச்சனா பட்நாயக் வெளியிட்டுள்ளார்.

1. பிரச்சாரத்திற்கு முழுமையான தடை:

நாளை மாலை 6 மணி முதல் தேர்தல் தொடர்பான எந்தவொரு பொதுக்கூட்டத்தையோ, ஊர்வலத்தையோ நடத்தவோ அல்லது அவற்றில் பங்கேற்கவோ கூடாது.

டிஜிட்டல் தடை: வாட்ஸ்ஆப், முகநூல் (Facebook), டிவிட்டர் (X) போன்ற சமூக வலைதளங்கள், எஃப்.எம். ரேடியோ மற்றும் குறுஞ்செய்திகள் வாயிலாகப் பிரச்சாரம் செய்யத் தடை விதிக்கப்பட்டுள்ளது.

கேளிக்கை நிகழ்ச்சிகள்: இசை நிகழ்ச்சிகள் அல்லது பொழுதுபோக்கு நிகழ்ச்சிகள் மூலம் வாக்காளர்களை ஈர்க்கும் வகையில் எவ்விதப் பிரச்சாரமும் செய்யக்கூடாது.

தண்டனை: இந்த விதிகளை மீறுபவர்களுக்கு 1951-ஆம் ஆண்டு மக்கள் பிரதிநிதித்துவச் சட்டத்தின்படி 2 ஆண்டுகள் சிறைத் தண்டனை அல்லது அபராதம் விதிக்கப்படும்.

2. வெளியூர் நபர்கள் வெளியேற வேண்டும்:

தேர்தல் நடக்கும் தொகுதியின் வாக்காளர்கள் அல்லாத அரசியல் கட்சி நிர்வாகிகள் மற்றும் பணியாளர்கள் நாளை மாலை 6 மணிக்கு மேல் அந்தத் தொகுதியில் இருக்கக்கூடாது.

கல்யாண மண்டபங்கள், சமுதாயக் கூடங்கள் மற்றும் தங்கும் விடுதிகளில் ‘வெளிநாட்டினர்’ (தொகுதிக்கு வெளியே உள்ளவர்கள்) தங்கியுள்ளனரா என்பதைத் தேர்தல் ஆணையம் அதிரடியாகச் சோதனையிடும்.

3. வாகனக் கட்டுப்பாடுகள்:

வேட்பாளர்கள் மற்றும் நட்சத்திரப் பேச்சாளர்களுக்கு வழங்கப்பட்ட வாகன அனுமதிகள் நாளை மாலை 6 மணியுடன் ரத்தாகிவிடும்.

வேட்பாளர் தனது சொந்த பயன்பாட்டிற்கு ஒரு வாகனம், தேர்தல் முகவருக்கு ஒரு வாகனம் மற்றும் பணியாளர்களுக்கு ஒரு வாகனம் மட்டுமே பயன்படுத்த அனுமதி உண்டு.

வாக்காளர்களை அழைத்து வரத் தடை: வாக்காளர்களைத் தங்கள் வாகனங்களில் அழைத்து வருவது தண்டனைக்குரிய குற்றமாகும்.

4. தேர்தல் அலுவலகம்:

வாக்குச்சாவடியில் இருந்து 100 மீட்டர் தொலைவிற்கு வெளியேதான் வேட்பாளர்களின் தற்காலிகத் தேர்தல் அலுவலகம் அமைக்கப்பட வேண்டும்.

அந்த அலுவலகத்தில் அதிகபட்சமாக இரண்டு நபர்கள் மட்டுமே இருக்க அனுமதி உண்டு; தேவையற்ற கூட்டத்தைத் தவிர்க்க வேண்டும்.

தமிழகத்தில் ஏப்ரல் 23-ஆம் தேதி காலை 7 மணி முதல் மாலை 6 மணி வரை வாக்குப்பதிவு நடைபெறவுள்ளது. அமைதியான முறையில் தேர்தலை நடத்த பொதுமக்கள் மற்றும் அரசியல் கட்சியினர் ஒத்துழைப்பு வழங்க வேண்டும் எனத் தலைமைத் தேர்தல் அதிகாரி கேட்டுக்கொண்டுள்ளார்.