செங்கல்பட்டு மாவட்டம் திருக்கழுக்குன்றத்தில் உள்ள Vedagiriswarar Temple மலைக்கோவிலுக்கு செல்லும் மலைவலப்பாதையில் போதிய கழிப்பறை வசதி இல்லாததால் பக்தர்கள் கடும் சிரமத்துக்கு உள்ளாகி வருகின்றனர்.
இந்த மலைவலப்பாதை சுமார் 3 கிலோமீட்டர் நீளமுடையது. பவுர்ணமி மற்றும் முக்கிய பண்டிகை நாட்களில் சென்னை மற்றும் சுற்றுவட்டார பகுதிகளில் இருந்து ஆயிரக்கணக்கான பக்தர்கள் கிரிவலம் செல்வது வழக்கம். குறிப்பாக சித்ரா பவுர்ணமி நாளில் லட்சக்கணக்கானோர் இந்த பாதையில் நடைபயணம் மேற்கொள்கின்றனர்.
ஆனால், மலைவலப்பாதையில் போதிய கழிப்பறை வசதி இல்லாததால் பெண்கள், முதியோர் மற்றும் குழந்தைகள் பெரும் அவதிக்குள்ளாகின்றனர் என்று பக்தர்கள் குற்றம்சாட்டுகின்றனர். வன்னியடி விநாயகர் கோவில் அருகே இரண்டு ஆண்டுகளுக்கு முன்பு கட்டப்பட்ட கழிப்பறை இன்னும் திறக்கப்படாமல் பூட்டியே கிடப்பதாகவும், இரும்புலி பகுதி அருகே கடந்த ஆண்டு கட்டப்பட்ட மற்றொரு கழிப்பறையும் பயன்பாட்டிற்கு வராமல் இருப்பதாகவும் தெரிவித்துள்ளனர்.
மேலும், மலைவலப்பாதையில் ஒவ்வொரு கிலோமீட்டருக்கும் ஒரு கழிப்பறை என்ற அடிப்படையில் குறைந்தது மூன்று புதிய கழிப்பறைகள் அமைக்க அதிகாரிகள் உடனடி நடவடிக்கை எடுக்க வேண்டும் என பக்தர்கள் கோரிக்கை விடுத்துள்ளனர்.
