தாம்பரம் போலீஸ் கமிஷனர் சஞ்சய் குமார் உத்தரவின் பேரில், தாம்பரம் காவல் ஆணையரக எல்லைக்குட்பட்ட பகுதிகளில் கடந்த 3 நாட்களாக தீவிர குற்றத் தடுப்பு மற்றும் போதைப்பொருள் ஒழிப்பு நடவடிக்கைகள் மேற்கொள்ளப்பட்டு வருகின்றன. இந்த அதிரடி சோதனைகளில் மொத்தம் 96 பேர் கைது செய்யப்பட்டுள்ளதாக காவல்துறை தெரிவித்துள்ளது.
காவல்துறையினர் நடத்திய சோதனைகளில் கைது செய்யப்பட்டவர்களிடமிருந்து சுமார் 70 கிலோ கஞ்சா மற்றும் 1,470 போதை மாத்திரைகள் பறிமுதல் செய்யப்பட்டுள்ளன. மேலும், போதைப்பொருள் விற்பனை, கடத்தல் மற்றும் பயன்பாட்டில் ஈடுபட்டவர்களை கண்காணித்து தொடர்ந்து நடவடிக்கை எடுக்கப்பட்டு வருவதாகவும் அதிகாரிகள் தெரிவித்துள்ளனர்.
பள்ளி, கல்லூரி மாணவர்கள் மற்றும் இளைஞர்களை குறிவைத்து போதைப்பொருள் விற்பனை செய்யும் கும்பல்களை கட்டுப்படுத்தும் நோக்கில் இந்த சிறப்பு நடவடிக்கைகள் மேற்கொள்ளப்பட்டுள்ளதாக கூறப்படுகிறது. அதேபோல், பெண்களை கேலி செய்தல், தொல்லை அளித்தல், பொது இடங்களில் அசம்பாவிதங்களில் ஈடுபடுதல் போன்ற சமூக விரோத செயல்களில் ஈடுபடுவோர் மீதும் கடுமையான நடவடிக்கை எடுக்கப்படும் என போலீசார் எச்சரித்துள்ளனர்.
தாம்பரம் மற்றும் சுற்றுவட்டார பகுதிகளில் இரவு நேர ரோந்து, வாகன சோதனை மற்றும் சந்தேக நபர்கள் மீதான கண்காணிப்பு தீவிரப்படுத்தப்பட்டுள்ளதாகவும், பொதுமக்கள் பாதுகாப்பை உறுதி செய்ய காவல்துறை தொடர்ந்து கண்காணிப்பு பணியில் ஈடுபட்டு வருவதாகவும் தெரிவிக்கப்பட்டுள்ளது.
போதைப்பொருள் மற்றும் குற்றச்செயல்களை கட்டுப்படுத்த காவல்துறையின் இந்த அதிரடி நடவடிக்கைக்கு பொதுமக்கள் வரவேற்பு தெரிவித்துள்ளனர்.
