இந்திய நீதித்துறை வரலாற்றில் இதுவரை கண்டிராத ஒரு அதிரடி முடிவை டெல்லி முதல்வர் அரவிந்த் கெஜ்ரிவால் எடுத்துள்ளார். சிபிஐ தொடர்ந்துள்ள மதுபானக் கொள்கை வழக்கில், டெல்லி உயர் நீதிமன்ற நீதிபதி ஸ்வர்ண காந்தா சர்மாவின் நீதிமன்ற நடவடிக்கைகளைத் தாம் முற்றிலுமாகப் புறக்கணிக்கப் போவதாக அறிவித்து, அவர்க்கே கடிதம் எழுதியுள்ளார். ஒரு வழக்காடி, ஒரு நீதிபதியைப் பகிரங்கமாகப் புறக்கணிப்பதாக அறிவித்துள்ளது நாடு முழுவதும் மிகப்பெரிய விவாதத்தை ஏற்படுத்தியுள்ளது.
நீதிபதி ஸ்வர்ண காந்தா சர்மாவுக்கு எழுதியுள்ள அந்த விரிவான கடிதத்தில், கெஜ்ரிவால் தனது முடிவிற்கான காரணங்களை மிகவும் ஆணித்தரமாகப் பதிவு செய்துள்ளார். “மிகுந்த பணிவுடனும், நீதித்துறையின் மீதுள்ள முழு மரியாதையுடனும் இந்த முடிவை எடுக்கிறேன். ஆனால், இந்த நீதிமன்றத்தின் முன்னால் நடக்கும் நடவடிக்கைகள், ‘நீதி வழங்கப்படுவதுடன் மட்டுமல்லாமல், அது வழங்கப்படுவது வெளிப்படையாகவும் தெரிய வேண்டும்’ என்ற அடிப்படைத் தத்துவத்தைப் பூர்த்தி செய்யவில்லை என நான் கருதுகிறேன்,” என்று அவர் குறிப்பிட்டுள்ளார்.
சிபிஐ வழக்கில் இனி பங்கேற்கப் போவதில்லை என்பதோடு, பாஜக, ஆர்எஸ்எஸ் மற்றும் சொலிசிட்டர் ஜெனரல் மேத்தா ஆகியோர் சம்பந்தப்பட்ட எதிர்கால வழக்குகள் எதிலும் இந்த அமர்வின் முன் ஆஜராகப்போவதில்லை எனத் தெரிவித்துள்ளார்.
தனது இந்த நடவடிக்கையைக் ‘காந்திய சத்தியாகிரகம்’ என வர்ணித்துள்ள அவர், மனசாட்சியின் படி வேறு வழியில்லாததால் இந்த முடிவை எடுத்துள்ளதாகக் கூறியுள்ளார். இந்த முடிவினால் தனது சட்டப்பூர்வ நலன்களுக்குப் பாதிப்பு ஏற்படலாம் என்பதையும், சட்ட ரீதியான எதிர்மறை விளைவுகளைச் சந்திக்க வேண்டியிருக்கும் என்பதையும் தாம் முழுமையாக உணர்ந்திருப்பதாகவும், அந்தச் சுமையைத் தாங்கத் தயாராக இருப்பதாகவும் அவர் கூறியுள்ளார்.
நீதித்துறை செயல்பாட்டின் நடுநிலைமை மீது பொதுமக்களுக்கு இருக்கும் நம்பிக்கையை முன்னிறுத்தியே இந்த முடிவை எடுத்துள்ளதாகக் கெஜ்ரிவால் விளக்கியுள்ளார். இது கோபத்தினாலோ அல்லது அவமரியாதை செய்யும் நோக்கத்திலோ எடுக்கப்பட்ட முடிவல்ல என்பதையும் அவர் தெளிவுபடுத்தியுள்ளார். ஒரு மாநிலத்தின் முதல்வர், உயர் நீதிமன்ற நீதிபதியின் நடுநிலைமை குறித்து நேரடியாகக் கேள்வி எழுப்பி, நீதிமன்ற நடவடிக்கைகளைப் புறக்கணிப்பது இதுவே முதல்முறை எனக் கருதப்படுகிறது. இது சட்ட ரீதியாகவும், அரசியல் ரீதியாகவும் மிகப்பெரிய தாக்கத்தை ஏற்படுத்தும் என எதிர்பார்க்கப்படுகிறது.
