தமிழக சட்டமன்றத் தேர்தல் 2026, முன்னெப்போதும் இல்லாத வகையில் புதிய வரலாற்றுச் சாதனைகளை நிகழ்த்தி இன்று இனிதே நிறைவுபெற்றுள்ளது. மாநிலம் முழுவதும் பதிவான 84.69% என்ற இமாலய வாக்குப்பதிவு, தமிழக மக்களின் ஜனநாயகப் பற்றையும் விழிப்புணர்வையும் பறைசாற்றுவதாக அமைந்துள்ளது. எவ்விதப் பெரிய அசம்பாவிதங்களுமின்றி அமைதியான முறையில் தேர்தல் நடந்து முடிந்ததைத் தொடர்ந்து, தமிழக முதல்வர் திரு. மு.க. ஸ்டாலின் அவர்கள் வாக்களித்த மக்களுக்குத் தனது மனமார்ந்த பாராட்டுகளைத் தெரிவித்துள்ளார்.
தேர்தல் நிறைவு குறித்து முதல்வர் வெளியிட்டுள்ள செய்தியில், மக்களின் பொறுப்புணர்வை வெகுவாகப் பாராட்டியுள்ளார். சுட்டெரிக்கும் கோடை வெயிலையும் பொருட்படுத்தாமல், பல நூறு கிலோமீட்டர் தூரம் பயணித்து வந்து தங்களின் வாக்குகளைப் பதிவு செய்துள்ள பொதுமக்களின் ஆர்வம் அவரை நெகிழச் செய்துள்ளது.
இது குறித்து அவர் கூறுகையில், “பலர் நீண்ட தூரம் பயணித்து வந்து வாக்களித்து விட்டு, இன்றிரவே மீண்டும் கிளம்பி அவரவர் பணியாற்றும் ஊர்களுக்குச் செல்கின்றனர். ‘ஒரு வாக்குதானே’ என எண்ணாமல், ‘ஒரு தலைமுறைக்கான தேர்தல் இது’ என்ற நினைப்பே இந்த உந்துதலுக்குக் காரணமாக இருக்க முடியும். அத்தகைய பொறுப்புள்ள குடிமக்கள் அனைவருக்கும் எனது பாராட்டுகள்” எனப் புகழாரம் சூட்டியுள்ளார்.
தமிழகத் தேர்தல் என்றாலே நிலவும் வழக்கமான பரபரப்புகளுக்கு மத்தியில், இந்த முறை 234 தொகுதிகளிலும் மிக அமைதியான முறையில் வாக்குப்பதிவு நடைபெற்றுள்ளது. முதியவர்கள், இளைஞர்கள் மற்றும் முதல்முறை வாக்காளர்கள் என அனைத்துத் தரப்பினரும் உற்சாகத்துடன் வந்து வாக்களித்தனர். குறிப்பாக, வெளியூர்களில் பணியாற்றும் இளைஞர்கள் தங்களின் ஜனநாயகக் கடமையை ஆற்றுவதற்காகப் பேருந்து மற்றும் ரயில்கள் மூலம் சொந்த ஊர்களுக்கு வந்து சென்றது இத்தேர்தலின் முக்கிய அம்சமாகப் பார்க்கப்படுகிறது.
வாக்குப்பதிவு நிறைவடைந்ததைத் தொடர்ந்து, அனைத்து வாக்குப்பதிவு இயந்திரங்களும் (EVM) பாதுகாப்பாகச் சீல் வைக்கப்பட்டு, பலத்த பாதுகாப்புடன் வாக்கு எண்ணும் மையங்களுக்குக் கொண்டு செல்லப்பட்டுள்ளன. தமிழகமே ஆவலோடு எதிர்பார்க்கும் இந்தத் தேர்தல் முடிவுகள் வரும் மே 4-ஆம் தேதி வெளியாகவுள்ளன.
