புற்றுநோயால் பாதிக்கப்படுபவர்களின் எண்ணிக்கை உலகளவில் அதிகரித்து வரும் சூழலில், நமது அன்றாட உணவு முறையில் சில மாற்றங்களைச் செய்வதன் மூலம் இந்த அபாயத்தைக் குறைக்க முடியும் என்று மருத்துவ ஆய்வுகள் தெரிவிக்கின்றன. பழங்கள், காய்கறிகள் மற்றும் சில குறிப்பிட்ட வகை உணவுகளில் உள்ள பாதுகாப்புச் சேர்மங்கள் புற்றுநோய் செல்களின் வளர்ச்சியைத் தடுக்கவும், ஆரோக்கியமான செல்களைப் பாதுகாக்கவும் உதவுகின்றன.
புற்றுநோயை எதிர்க்கும் முக்கிய உணவுகள்
உணவே மருந்து என்பதற்கேற்ப, கீழே உள்ள உணவுகளை உங்கள் டயட்டில் அடிக்கடி சேர்த்துக்கொள்வது நல்லது.
சர்க்கரைவள்ளிக் கிழங்கு: ஊதா நிற சர்க்கரைவள்ளிக் கிழங்குகளில் ‘ஆந்தோசயனின்கள்’ எனும் ஆன்டிஆக்ஸிடன்ட்கள் அதிகம் உள்ளன. இவை குறிப்பாகப் பெருங்குடல் புற்றுநோய் செல்களின் வளர்ச்சியை மெதுவாக்க உதவுகின்றன.
பெர்ரி வகைகள்: நீலம், ஊதா மற்றும் சிவப்பு நிற பெர்ரிகளில் உள்ள நார்ச்சத்து மற்றும் ஆந்தோசயனின்கள் செரிமான மண்டலத்தில் புற்றுநோய் வராமல் தடுக்கின்றன.
சிலுவைக் காய்கறிகள்: ப்ரோக்கோலி, காலிஃபிளவர் மற்றும் முட்டைக்கோஸ் போன்ற காய்கறிகளில் ‘இண்டோல்-3-கார்பினோல்’ என்ற புற்றுநோயை எதிர்க்கும் தனித்துவமான சேர்மம் உள்ளது.
மீன் வகைகள்: சூரை, சால்மன், மத்தி போன்ற மீன்களில் உள்ள ஒமேகா-3 கொழுப்பு அமிலங்கள் அழற்சியை எதிர்த்துப் போராடுவதுடன், மார்பக மற்றும் பெருங்குடல் புற்றுநோயிலிருந்து பாதுகாப்பு அளிக்கின்றன.
பூண்டு: இதில் உள்ள ‘அல்லிசின்’ எனும் கந்தகச் சேர்மம் புற்றுநோய் வளர்ச்சியைத் தடுக்கும் சக்தி கொண்டது.
டார்க் சாக்லேட்: அதிக கோகோ கொண்ட டார்க் சாக்லேட்டில் உள்ள பாலிஃபீனால்கள் மற்றும் ஃபிளவனால்கள் ஆரோக்கியமான குடல் பாக்டீரியாக்களுக்கு ஊக்கமளிப்பதோடு புற்றுநோய் அபாயத்தையும் குறைக்கின்றன.
நொதிக்கவைக்கப்பட்ட உணவுகள்: தயிர் போன்ற புளிக்கவைக்கப்பட்ட உணவுகள் ‘புரோபயாடிக்குகளை’ வழங்குகின்றன. இவை நோய் எதிர்ப்புச் சக்தியை மேம்படுத்தி புற்றுநோய் காரணிகளைத் தடுக்கின்றன.
நட்ஸ் மற்றும் வால்நட்ஸ்: நார்ச்சத்து மற்றும் ஆரோக்கியமான கொழுப்புகள் நிறைந்த நட்ஸ் வகைகள், குறிப்பாக வால்நட்கள் புற்றுநோயை எதிர்க்கும் பண்புகளைக் கொண்டுள்ளன.
பாதுகாப்பு முறைகள்
ஈஸ்ட்ரோஜன் போன்ற ஹார்மோன்களை ஒழுங்குபடுத்தவும், செல்களுக்கு ஏற்படும் சேதத்தைத் தணிக்கவும் இந்த உணவுகள் உதவுகின்றன. இருப்பினும், இவை பொதுவான தகவல் மட்டுமே; கடுமையான மருத்துவ அறிகுறிகள் இருந்தால் தகுதிவாய்ந்த மருத்துவரை அணுகி ஆலோசனை பெறுவது அவசியமாகும்.
