ஸ்மார்ட்போன் பயனர்களின் அன்றாட வாழ்வில் தவிர்க்க முடியாத அங்கமாக விளங்கும் யூடியூப் (YouTube) தளம், தனது வாடிக்கையாளர்களை உற்சாகப்படுத்தும் வகையில் ஒரு புதிய அதிரடி அறிவிப்பை வெளியிட்டுள்ளது. இதுவரை கட்டணம் செலுத்தும் பயனர்களுக்கு மட்டுமே வழங்கப்பட்டு வந்த ஒரு முக்கிய வசதி, இனி அனைவரும் பயன்படுத்தும் வகையில் இலவசமாக்கப்பட்டுள்ளது.
யூடியூப் தளத்தில் வீடியோக்களைப் பார்த்துக் கொண்டே பிற செயலிகளையும் பயன்படுத்த உதவும் Picture-in-Picture (PiP) வசதி இனி ஆண்ட்ராய்டு (Android) மற்றும் ஐஓஎஸ் (iOS) பயனர்களுக்கு இலவசமாகக் கிடைக்கும் எனத் தெரிவிக்கப்பட்டுள்ளது.
இதற்கு முன்னதாக, இந்த PiP வசதியைப் பயன்படுத்தப் பயனர்கள் யூடியூப் பிரீமியம் (Premium) சந்தாவிற்குத் தனியாகக் கட்டணம் செலுத்த வேண்டிய கட்டாயம் இருந்தது. இனி எவ்விதக் கூடுதல் கட்டணமும் இன்றி அனைத்து பயனர்களும் இந்த வசதியைப் பயன்படுத்திக் கொள்ளலாம். இசை அல்லாத நீண்ட வீடியோக்களுக்கு (Non-music long videos) மட்டுமே பயனர்கள் இந்த PiP வசதியை இலவசமாகப் பயன்படுத்த முடியும் என்பது குறிப்பிடத்தக்கது.
தொலைக்காட்சி பார்க்கும் பழக்கத்தையே குறைக்கும் அளவிற்கு ஆதிக்கம் செலுத்தி வரும் யூடியூப், அவ்வப்போது இது போன்ற புதிய அப்டேட்களை வழங்கி வருகிறது. குறிப்பாக, வீடியோவைப் பார்த்துக் கொண்டே வாட்ஸ்அப் (WhatsApp) அல்லது பிற சமூக வலைதளங்களைப் பயன்படுத்த விரும்புவோருக்கு இந்த அறிவிப்பு பெரும் வரப்பிரசாதமாக அமைந்துள்ளது. இந்த மாற்றத்தால் ஸ்மார்ட்போன் பயனர்கள் மிகுந்த மகிழ்ச்சி அடைந்துள்ளனர்.
