திருக்கழுக்குன்றம் ஏரி நீர்ப்பிடிப்பு பகுதியில் சாலை அமைக்கும் பணிகள் நடைபெறுவதாக எழுந்துள்ள குற்றச்சாட்டு, அப்பகுதியில் புதிய சர்ச்சையை ஏற்படுத்தியுள்ளது. இந்த பணிகள் ஏரியின் இயற்கை அமைப்பையும் நீர்ப்பிடிப்பு திறனையும் பாதிக்கக்கூடும் என சமூக ஆர்வலர்கள் எச்சரிக்கை விடுத்துள்ளனர்.
திருக்கழுக்குன்றம் பொதுப்பணித்துறை ஏரியை ஒட்டியுள்ள மாதுளங்குப்பம் பகுதியில் பல ஆண்டுகளாக விவசாய நிலங்கள் உள்ளன. அப்பகுதி மக்களின் கோரிக்கையைத் தொடர்ந்து, ஏரிக்கரை மண்பாதையில் சுமார் 10 ஆண்டுகளுக்கு முன்பு பேரூராட்சி நிர்வாகம் தார்ச்சாலை அமைத்தது.
இதற்கிடையில், அப்பகுதியில் உள்ள சில விவசாய நிலங்களை வீட்டுமனைகளாக மாற்றும் முயற்சிகள் கடந்த சில ஆண்டுகளாக நடைபெற்று வருவதாக கூறப்படுகிறது. இதற்காக புதிய அணுகுச்சாலை அமைக்க திட்டமிடப்பட்டதாகவும், அதற்காக ஏரியின் நீர்ப்பிடிப்பு பகுதியை கடந்து பாதை அமைக்க முயற்சி செய்யப்பட்டதாகவும் தகவல் வெளியாகியுள்ளது.
இந்த விவகாரம் தொடர்பாக நீதிமன்றத்தில் வழக்கு தொடரப்பட்டதால், அப்போதைய பணிகள் நிறுத்தப்பட்டதாக கூறப்படுகிறது. இருப்பினும், கடந்த டிசம்பர் மாதம் மீண்டும் கட்டுமான கழிவுகள் மற்றும் கிராவல் மண் கொட்டி பாதை அமைக்க முயற்சி மேற்கொள்ளப்பட்டதாக குற்றச்சாட்டு எழுந்தது. இதை பொதுப்பணித்துறை அதிகாரிகள் தடுத்து நிறுத்தியதாகவும் தகவல்கள் தெரிவிக்கின்றன.
தற்போது மீண்டும் இரவு நேரங்களில் கிராவல் மண் நிரப்பி சாலை அமைக்கும் பணிகள் நடைபெறுவதாக அப்பகுதி மக்கள் குற்றம் சாட்டுகின்றனர். சுமார் ஒரு கிலோமீட்டருக்கும் அதிகமான தூரத்தில் இந்த பாதை அமைக்கப்படுவதாகவும் கூறப்படுகிறது.
இந்த சாலை அமைக்கப்பட்டால் ஏரியின் நீர்ப்பிடிப்பு பகுதி இரண்டாகப் பிரிந்து சுற்றுச்சூழல் மற்றும் நீர் சேமிப்பு திறனில் பாதிப்பு ஏற்படும் என சமூக ஆர்வலர்கள் எச்சரித்துள்ளனர். எனவே, சம்பந்தப்பட்ட துறையினர் உடனடியாக ஆய்வு செய்து நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
