தமிழக சட்டமன்றத்தின் பதவிக்காலம் மே 10ஆம் தேதியுடன் நிறைவடைவதை முன்னிட்டு, 2026ஆம் ஆண்டுக்கான சட்டமன்ற தேர்தல் தேதிகளை இந்திய தேர்தல் ஆணையம் அறிவித்துள்ளது. அதன்படி, ஏப்ரல் 23ஆம் தேதி ஒரே கட்டமாக வாக்குப்பதிவு நடைபெறவுள்ளது. வாக்கு எண்ணிக்கை மே 4ஆம் தேதி நடைபெறும் எனவும் அறிவிக்கப்பட்டுள்ளது.
இந்த தேர்தலை முன்னிட்டு அரசியல் கட்சிகள் தீவிர பிரசாரத்தில் ஈடுபட்டன. ஆளும் தி.மு.க. தலைமையிலான கூட்டணியும், அ.தி.மு.க. தலைமையிலான கூட்டணியும் கடும் போட்டியில் ஈடுபட்டுள்ளன. இதனுடன், நாம் தமிழர் கட்சி மற்றும் த.வெ.க. ஆகிய கட்சிகளும் தனித்துப் போட்டியிடுவதால், இந்த தேர்தலில் நான்கு முனைப் போட்டி நிலவுகிறது.
தமிழகம் முழுவதும் கடும் வெயிலிலும் அரசியல் கட்சித் தலைவர்கள் தீவிர பிரசாரம் மேற்கொண்டு வந்தனர். இந்நிலையில், தேர்தல் பிரசாரம் ஏப்ரல் 21ஆம் தேதி மாலை 6 மணியுடன் நிறைவடைந்தது.
பிரசாரம் முடிவடைந்ததையடுத்து, 1951 மக்கள் பிரதிநிதித்துவச் சட்டத்தின் பிரிவு 126ன் கீழ் பல்வேறு கட்டுப்பாடுகள் அமலுக்கு வந்துள்ளன. அதன் படி, எந்தவொரு பொதுக்கூட்டம், ஊர்வலம், தேர்தல் தொடர்பான விளம்பரங்கள் ஆகியவை நடத்த தடை விதிக்கப்பட்டுள்ளது. சமூக ஊடகங்கள், தொலைக்காட்சி, வானொலி போன்றவற்றின் மூலம் தேர்தல் பிரசாரம் செய்வதும் முற்றிலும் தடை செய்யப்பட்டுள்ளது.
மேலும், தொகுதிக்கு வெளியிலிருந்து வந்த அரசியல் கட்சி நிர்வாகிகள் மற்றும் பணியாளர்கள் மாலை 6 மணிக்குள் வெளியேற வேண்டும் என்றும் அறிவுறுத்தப்பட்டுள்ளது. வாக்காளர்களை வாக்குச்சாவடிக்கு கொண்டு செல்ல வாகனங்கள் பயன்படுத்துவதும் சட்டவிரோதமாகும் என எச்சரிக்கப்பட்டுள்ளது.
இந்த விதிமுறைகளை மீறுவோருக்கு சிறை தண்டனை அல்லது அபராதம் விதிக்கப்படும் என அதிகாரிகள் தெரிவித்துள்ளனர். தேர்தல் சீராக நடைபெற பொதுமக்கள் ஒத்துழைக்க வேண்டும் எனவும் கேட்டுக்கொள்ளப்பட்டுள்ளது.
