சென்னை உயர் நீதிமன்றத்தின் நீதிபதிகள் பற்றாக்குறையைப் போக்கி, வழக்குகளின் விசாரணையைத் துரிதப்படுத்தும் நோக்கில், ஒரே நேரத்தில் 19 புதிய நீதிபதிகளை நியமிக்க உச்ச நீதிமன்ற கொலிஜியம் மத்திய அரசுக்கு அதிரடியாகப் பரிந்துரை செய்துள்ளது.
இந்தியத் தலைமை நீதிபதி சூர்யா காந்த் தலைமையிலான உச்ச நீதிமன்ற கொலிஜியம் நேற்று (மே 18) நடத்திய உயர்மட்டக் கூட்டத்தில் இந்த வரலாற்றுச் சிறப்புமிக்க ஒப்புதல் வழங்கப்பட்டுள்ளது. இந்த அதிரடிப் பட்டியலில் 9 மாவட்ட நீதிபதிகளுக்கு (Judicial Officers) உயர் நீதிமன்ற நீதிபதிகளாகப் பதவி உயர்வு வழங்கப் பரிந்துரைக்கப்பட்டுள்ளது. அதன்படி, டாக்டர் பி. முருகன், எம்.டி. சுமதி, எஸ். அல்லி, சி. திருமகள் சந்திரசேகர், தர்மலிங்கம் லிங்கேஸ்வரன், மற்றும் கார்த்திகேயன் பாலதண்டாயுதம் ஆகிய 6 மூத்த நீதிபதிகளின் பெயர்கள் இதில் இடம்பெற்றுள்ளன. இவர்களுடன் சண்முகம் கார்த்திகேயன், பாலுச்சாமி முருகேசன் மற்றும் என். குணசேகரன் ஆகியோரது பெயர்களும் கொலிஜியத்தால் இறுதி செய்யப்பட்டுள்ளன.
அதேபோல், சென்னை உயர் நீதிமன்றத்தில் நீண்ட காலமாகப் பணியாற்றி வரும் திறமை வாய்ந்த 10 மூத்த வழக்கறிஞர்களை (Advocates) நேரடியாக நீதிபதிகளாக்கவும் கொலிஜியம் பச்சைக்கொடி காட்டியுள்ளது. இதன்படி, நடராஜன் ரமேஷ், ஜி.கே. முத்துக்குமார், ராமகிருஷ்ணன் ராஜேஷ் விவேகானந்தன், சங்கரநாராயணன் ரவிக்குமார், நாகராஜன் திலீப்குமார், எல்லப்பன் மனோகரன், கிருஷ்ணசாமி கோவிந்தராஜன், ராஜ்னிஷ் பாத்யில், கே. அப்பாதுரை மற்றும் ராமசாமி அனிதா ஆகிய 10 வழக்கறிஞர்கள் உயர் நீதிமன்ற நீதிபதிகளாகப் பொறுப்பேற்கவுள்ளனர்.
சென்னை உயர் நீதிமன்றத்திற்கு அனுமதிக்கப்பட்ட ஒட்டுமொத்த நீதிபதிகளின் எண்ணிக்கை 75 ஆக உள்ள நிலையில், தற்போது வெறும் 52 நீதிபதிகள் மட்டுமே பணியில் உள்ளனர். இந்த 23 காலிப்பணியிடங்களால் லட்சக்கணக்கான வழக்குகள் தேங்கிக் கிடக்கும் சூழலில், கொலிஜியத்தின் இந்த 19 பேர் கொண்ட புதிய பரிந்துரைக்கு மத்திய சட்ட அமைச்சகம் ஒப்புதல் அளித்து, குடியரசுத் தலைவரின் அரசாணை வெளியானவுடன் இவர்கள் அனைவரும் முறைப்படி பதவியேற்கவுள்ளனர். இந்த அதிரடி நியமனப் பரிந்துரை ஒட்டுமொத்தத் தமிழக நீதித்துறையிலும் பெரும் வரவேற்பையும், அசுரப் பரபரப்பையும் ஏற்படுத்தியுள்ளது.
