செங்கல்பட்டு மாவட்டம் திருப்போரூர் அருகே நெம்மேலி பகுதியில் நடைபெற்று வரும் மாமல்லன் நீர்த்தேக்கப் பணிகளை நீர்வளத் துறை அமைச்சர் ஆனந்த் மற்றும் மாவட்ட ஆட்சியர் வீரப்பன் ஆகியோர் இன்று நேரில் பார்வையிட்டு ஆய்வு செய்தனர். இந்த ஆய்வின் போது, திட்டமிடப்பட்ட நேரத்தை விட அமைச்சர் 2 மணி நேரத்திற்கும் மேலாகத் தாமதமாக வந்ததால், அவரை வரவேற்கக் கைகளில் பூங்கொத்துகளுடன் நின்றிருந்த அரசு உயர் அதிகாரிகள் கால் கடுக்கக் காத்துக் கிடந்த விவகாரம் தற்பொழுது விவாதப் பொருளாக மாறியுள்ளது.
சென்னையின் முக்கிய குடிநீர் தேவையைப் பூர்த்தி செய்யும் வகையில், செங்கல்பட்டு மாவட்டம் திருப்போரூர் அருகே 5,161 ஏக்கர் நிலப்பரப்பில், 342 கோடி ரூபாய் மதிப்பீட்டில் ‘மாமல்லன்’ நீர்த்தேக்கம் அமைக்கும் பணி கடந்த ஜனவரி மாதம் அடிக்கல் நாட்டப்பட்டுத் தற்பொழுது பணிகள் விறுவிறுப்பாக நடைபெற்று வருகின்றன. மானாமதி உள்ளிட்ட 69 ஏரிகளிலிருந்து வீணாக வெளியேறி கடலில் கலக்கக்கூடிய உபரிநீரைச் சேமிக்கும் நோக்கில் இந்த நீர்த்தேக்கம் உத்திசார் முறையில் அமைக்கப்படுகிறது.
மொத்தம் 1.65 டி.எம்.சி. கொள்ளளவில், 34 கி.மீ. நீளத்திற்குப் பிரம்மாண்ட கரையுடன் இந்த நீர்த்தேக்கம் உருவாக்கப்பட்டு வருகிறது. இதன் மூலம் நாள்தோறும் 170 மில்லியன் லிட்டர் குடிநீரை விநியோகம் செய்ய முடியும். சோழிங்கநல்லூர், மேடவாக்கம், பள்ளிக்கரணை, சிறுசேரி, கேளம்பாக்கம், திருப்போரூர் உள்ளிட்ட பகுதிகளில் வசிக்கும் சுமார் 17 லட்சம் மக்களுக்கு இத்திட்டம் வரப்பிரசாதமாக அமைய உள்ளது.
இந்த முக்கியப் பணிகளை ஆய்வு செய்ய வந்த நீர்வளத் துறை அமைச்சர் ஆனந்தை முறைப்படி வரவேற்கும் விதமாகச் செங்கல்பட்டு மாவட்ட ஆட்சியர் மற்றும் பல்வேறு துறை சார்ந்த உயர்மட்ட அதிகாரிகள், வண்ணமயமான பூங்கொத்துகள், பொன்னாடைகள் மற்றும் நினைவுப் பரிசுகளுடன் அங்கு ஆவலோடு காத்திருந்தனர். ஆனால், திட்டமிடப்பட்ட நேரத்தைக் கடந்து 2 மணி நேரமாகியும் அமைச்சர் வராததால், நேரம் செல்லச் செல்ல வரவேற்க நின்றிருந்த அதிகாரிகளின் முகம் சோர்வடையத் தொடங்கியது. அரசு அதிகாரிகள் மற்றும் ஊழியர்கள் கைகளில் பூங்கொத்துகளுடன் கால் கடுக்கத் தவிப்புடன் காத்து நின்ற அவல நிலை அங்கு நிலவியது. பின்னர் தாமதமாக வந்த அமைச்சர், அதிகாரிகளுடன் இணைந்து நீர்த்தேக்கப் பணிகளின் தற்போதைய நிலை குறித்துப் போர்க்கால அடிப்படையில் ஆய்வு செய்து, பணிகளை விரைந்து முடிக்க அறிவுறுத்தினார்.
