தமிழகச் சட்டமன்றத் தேர்தலில் தமிழக வெற்றிக் கழகம் (தவெக) வெற்றி பெற்று, அக்கட்சியின் தலைவர் விஜய் முதலமைச்சராகப் பொறுப்பேற்றுள்ள நிலையில், அதிமுக-வின் துணைப் பொதுச்செயலாளர் கே.பி. முனுசாமி அவர் மீது கடுமையான விமர்சனங்களை முன்வைத்துள்ளார். இன்று நடைபெற்ற சட்டமன்ற நம்பிக்கை வாக்கெடுப்பின் போது அதிமுக-வின் ஒரு தரப்பு எம்.எல்.ஏ.-க்கள் விஜய்க்கு ஆதரவளித்ததைத் தொடர்ந்து, அதிமுக தலைமை தவெக மீது கடும் கோபத்தில் உள்ளது.
கே.பி. முனுசாமி இன்று செய்தியாளர்களிடம் பேசிய ஆவேசமான கருத்துக்கள் இதோ, “தேர்தல் பின்னடைவு என்ற சோகத்தின் ஈரம் கூட இன்னும் காயவில்லை. அதற்குள்ளாகவே எங்களது இயக்கத்தைப் பிரித்து ஆள வேண்டும் என்றும், அதிமுக-வைச் சிதைத்துத் தவெக-வின் கைப்பாவையாக மாற்ற வேண்டும் என்றும் துடிக்கும் இவர்களிடம் நான் என்ன பேசுவது என்றே தெரியவில்லை,” என்று கே.பி. முனுசாமி ஆதங்கத்துடன் தெரிவித்தார்.
முதலமைச்சர் விஜய்யின் செயல்பாடுகளைக் கடுமையாக விமர்சித்த அவர், “தூய சக்தி என்று உங்களைச் சொல்லிக் கொள்கிறீர்களே, நான்காம் தர அரசியல்வாதி போலச் செயல்படும் நீங்களா தூய சக்தி? அரசியல் முதிர்ச்சியின்றி குறுக்கு வழியில் ஆட்சியைத் தக்கவைக்க முயற்சிக்கும் முதலமைச்சர் விஜய்யின் உண்மையான முகத்தை மக்கள் விரைவில் தெரிந்து கொள்வார்கள்,” என்று எச்சரித்தார்.
நம்பிக்கை வாக்கெடுப்பில் முதலமைச்சர் விஜய்க்கு ஆதரவாகச் செயல்பட்ட சி.வி. சண்முகம் மற்றும் எஸ்.பி. வேலுமணி உள்ளிட்ட 25 முக்கிய நிர்வாகிகளை அதிமுக பொதுச்செயலாளர் எடப்பாடி பழனிசாமி (EPS) கட்சியிலிருந்து அதிரடியாக நீக்கியுள்ளார். “அதிமுக என்பது எம்.ஜி.ஆர் மற்றும் அம்மாவால் உருவாக்கப்பட்ட இரும்புக்கோட்டை. அதனை யாராலும் அசைக்க முடியாது” என இபிஎஸ் தரப்பு கூறி வரும் வேளையில், கே.பி. முனுசாமியின் இந்தப் பேச்சு தமிழக அரசியலில் புதிய அனலைக் கிளப்பியுள்ளது.
