சிபிஐ (CBI) இயக்குநர் பிரவீன் சூட்டின் பதவிக்காலத்தை மேலும் ஓராண்டுக்கு நீட்டித்து மத்திய அமைச்சரவையின் நியமனக் குழு (ACC) இன்று உத்தரவிட்டுள்ளது. இதன்படி, வரும் மே 24, 2026 அன்று நிறைவடைய இருந்த அவரது பதவிக்காலம், தற்போது மே 24, 2027 வரை நீட்டிக்கப்பட்டுள்ளது.
கர்நாடக கேடர் 1986-ஆம் ஆண்டு பேட்ச் ஐபிஎஸ் அதிகாரியான பிரவீன் சூட், கடந்த 2023-ஆம் ஆண்டு மே மாதம் இரண்டு ஆண்டுகள் கால அளவிற்குச் சிபிஐ இயக்குநராக நியமிக்கப்பட்டார். அவரது இரண்டு ஆண்டு பதவிக்காலம் முடிந்த நிலையில், கடந்த 2025-ஆம் ஆண்டு அவருக்கு முதல் முறையாக ஓராண்டு பணி நீட்டிப்பு வழங்கப்பட்டது. தற்போது இரண்டாவது முறையாக அவருக்கு மீண்டும் ஓராண்டு பணி நீட்டிப்பு வழங்கப்பட்டுள்ளது குறிப்பிடத்தக்கது.
பிரதமர் நரேந்திர மோடி தலைமையிலான உயர்மட்டத் தேர்வுக் குழுவின் பரிந்துரையின் அடிப்படையில் இந்த முடிவு எடுக்கப்பட்டுள்ளது. இக்குழுவில் உச்ச நீதிமன்றத் தலைமை நீதிபதி சூர்ய காந்த் மற்றும் மக்களவை எதிர்க்கட்சித் தலைவர் ராகுல் காந்தி ஆகியோர் இடம்பெற்றிருந்தனர். நேற்று நடைபெற்ற இக்குழுவின் கூட்டத்தில் எடுக்கப்பட்ட முடிவைத் தொடர்ந்து, இன்று பணியாளர் நல அமைச்சகம் இதற்கான அதிகாரப்பூர்வ உத்தரவை வெளியிட்டது.
இந்த பணி நீட்டிப்பு முடிவில் மக்களவை எதிர்க்கட்சித் தலைவர் ராகுல் காந்தி தனது மாறுபட்ட கருத்தைப் (Dissent Note) பதிவு செய்துள்ளார். சிபிஐ இயக்குநர் தேர்வு மற்றும் நீட்டிப்பு நடைமுறைகளில் வெளிப்படைத்தன்மை இல்லை என்று அவர் குற்றம் சாட்டியுள்ள நிலையில், மத்திய அரசு இந்த அதிரடி உத்தரவைப் பிறப்பித்துள்ளது.
