தமிழகச் சட்டமன்றத் தேர்தல் முடிவுகள் ஒட்டுமொத்த மாநிலத்தையும் உற்றுநோக்க வைத்துள்ள நிலையில், தலைநகர் சென்னையின் முக்கியத் தொகுதியான கொளத்தூரில் ஒரு மிகப்பெரிய அரசியல் மாற்றம் நிகழும் சூழல் உருவாகியுள்ளது. முதலமைச்சர் மு.க. ஸ்டாலின் போட்டியிடும் இந்தத் தொகுதியில், தற்போதைய வாக்கு எண்ணிக்கை நிலவரப்படி அவர் கடும் பின்னடைவைச் சந்தித்து வருகிறார்.
கொளத்தூர் தொகுதியில் வாக்கு எண்ணிக்கை மிக விறுவிறுப்பாக நடைபெற்று வருகிறது. கொளத்தூர் தொகுதியில் 16-வது சுற்று வாக்கு எண்ணிக்கை முடிவடைந்த நிலையில், முதல்வர் மு.க. ஸ்டாலின் பின்னடைவைச் சந்தித்துள்ளார்.
தமிழக வெற்றிக் கழகத்தின் வேட்பாளர் வி.எஸ்.பாபு, முதல்வர் ஸ்டாலினை விட சுமார் 7,700 வாக்குகள் வித்தியாசத்தில் முன்னிலையில் உள்ளார். தொடக்கத்திலிருந்தே தவெக வேட்பாளர் முன்னிலை பெற்று வருவது திமுக முகாமில் பெரும் அதிர்ச்சியை ஏற்படுத்தியுள்ளது.
மாநிலம் முழுவதும் தமிழக வெற்றிக் கழகம் 109 தொகுதிகளில் முன்னிலை பெற்று வரும் நிலையில், முதல்வரின் சொந்தத் தொகுதியிலேயே தவெக வேட்பாளர் முன்னிலை வகிப்பது அக்கட்சியின் பலத்தை நிரூபிக்கும் வகையில் அமைந்துள்ளது. குறிப்பாக, “தி கிரேட்டஸ்ட் ஆஃப் ஆல் டைம்” என ரசிகர்களால் கொண்டாடப்படும் விஜய், தமிழக அரசியலின் திசையை மாற்றி அமைப்பார் என்ற எதிர்பார்ப்பு தற்போது உண்மையாகி வருகிறது.
சென்னை மற்றும் தமிழகத்தின் பிற பகுதிகளில் தவெக தொண்டர்கள் இந்த முன்னிலையைக் கொண்டாடி வருகின்றனர். அடுத்தடுத்த சுற்று முடிவுகளில் இந்த வாக்கு வித்தியாசம் குறையுமா அல்லது வி.எஸ்.பாபு வெற்றியை உறுதி செய்வாரா என்பது இன்னும் சில மணிநேரங்களில் தெரிந்துவிடும்.
