செங்கல்பட்டு அரசு சட்டக் கல்லூரியின் பட்டமளிப்பு விழா கல்லூரியின் வளாகத்தில் மிகவும் சிறப்பாக நடைபெற்றது. இந்த விழாவில் 450-க்கும் மேற்பட்ட இளங்கலை மற்றும் முதுகலை சட்டப் பட்டதாரிகளுக்குப் பட்டங்கள் வழங்கப்பட்டன.
சென்னை உயர் நீதிமன்ற நீதிபதி எம்.ஜோதிராமன் அவர்கள் தலைமை விருந்தினராகப் பங்கேற்று, மாணவர்களுக்குப் பட்டங்களை வழங்கி உரையாற்றினார். அப்போது அவர் பேசுகையில், “சட்டப்படிப்பை முடித்துள்ள இளைஞர்கள் தங்கள் வாழ்வில் மிகப் பெரிய நிலைக்கு உயர வேண்டும். கடின உழைப்பும், அர்ப்பணிப்பும் இருந்தால் நீங்கள் உச்ச நீதிமன்ற மற்றும் உயர் நீதிமன்ற நீதிபதிகளாகவும், புகழ்பெற்ற வழக்கறிஞர்களாகவும் உருவெடுக்க முடியும். பல்வேறு துறைகளிலும் உங்களுக்காகக் காத்திருக்கும் உயரிய பதவிகளை அடைய வேண்டும்” என மாணவர்களை ஊக்கப்படுத்தினார்.
முன்னதாக, சட்டக் கல்வி இயக்குநர் மற்றும் தமிழ்நாடு டாக்டர் அம்பேத்கர் சட்டப் பல்கலைக்கழகப் பதிவாளர் கௌரி ரமேஷ் அவர்கள் முன்னிலை வகித்து உரையாற்றினார். அவர் பேசுகையில், சட்டக் கல்வி பயின்றவர்களுக்குத் தற்காலத்தில் ஏராளமான வேலைவாய்ப்புகள் கொட்டிக் கிடப்பதாகவும், அந்த வாய்ப்புகளைச் சரியான முறையில் பயன்படுத்தி ஒழுக்கத்துடன் வாழ்க்கையில் முன்னேற வேண்டும் என்றும் அறிவுறுத்தினார்.
விழாவின் தொடக்கத்தில் கல்லூரி முதல்வர் ஆர்.தங்கரமணி அனைவரையும் வரவேற்றார். தொடர்ந்து பட்டமளிப்பு விழாவிற்கான உறுதிமொழி ஏற்பு நிகழ்ச்சி நடைபெற்றது. மூன்றாண்டு, ஐந்தாண்டு மற்றும் முதுகலை சட்டப்படிப்பு முடித்த 450-க்கும் மேற்பட்டோர் இந்த விழாவில் பட்டங்களைப் பெற்றனர். இந்தச் சிறப்பான நாளின் நினைவாகத் தலைமை விருந்தினர் நீதிபதி எம்.ஜோதிராமன் அவர்கள் கல்லூரி வளாகத்தில் மரக்கன்று ஒன்றை நட்டு வைத்தார்.
இந்த விழாவில் திருவள்ளூர் மற்றும் சென்னை டாக்டர் அம்பேத்கர் சட்டக் கல்லூரி முதல்வர் என்.கயல்விழி உள்ளிட்ட பல முக்கியப் பிரமுகர்கள் கலந்துகொண்டனர். கல்லூரியின் பேராசிரியர்கள் மற்றும் மாணவர்கள் விழா ஏற்பாடுகளைச் சிறப்பாகச் செய்திருந்தனர். முடிவில் உதவிப் பேராசிரியர் ஆர்.ஏழுமலை நன்றி கூறினார்.
