தமிழ்நாடு முதலமைச்சர் ச. ஜோசப் விஜய் தனது அடுத்த டெல்லி பயணத்தின்போது, காங்கிரஸ் பேரியக்கத்தின் மூத்த தலைவர் ராகுல் காந்தியை நேரில் சந்தித்து நிச்சயம் ஆலோசனை நடத்துவார்” என்று அகில இந்திய வல்லுநர்கள் காங்கிரஸ் தலைவர் பிரவீன் சக்கரவர்த்தி சென்னை விமான நிலையத்தில் செய்தியாளர்களிடம் தெரிவித்துள்ளார்.
தமிழ்நாடு முதலமைச்சர் விஜய் தனது இரண்டு நாள் அரசு முறை பயணத்தை முடித்துக்கொண்டு மீண்டும் சென்னை வந்தடைந்தார். டெல்லியில் அவருக்கு உற்சாக வரவேற்பு அளிக்கப்பட்டதைத் தொடர்ந்து, மாண்புமிகு பிரதமர் நரேந்திர மோடி மற்றும் மத்திய நிதி அமைச்சர் நிர்மலா சீதாராமன் ஆகியோரை நேரில் சந்தித்துத் தமிழ்நாட்டின் வளர்ச்சிப் பணிகளுக்கான நிதி மற்றும் திட்டங்கள் குறித்த கோரிக்கை மனுக்களைச் சமர்ப்பித்தார்.
முன்னதாக, டெல்லி சென்றுள்ள முதல்வர் விஜய், ராகுல் காந்தி, சோனியா காந்தி மற்றும் இடதுசாரித் தலைவர்களைச் சந்தித்துப் பேச வாய்ப்புகள் இருப்பதாகக் கூறப்பட்டது. ஆனால், இந்த இரண்டு நாள் பயணத்தை முழுமையாக அரசு முறைப் பயணமாக மட்டுமே கையாண்ட முதல்வர் விஜய், அரசியல் தலைவர்களை எவரையும் சந்திக்காமல் சென்னை திரும்பினார். இதனால், ராகுல் காந்தியை அவர் ஏன் சந்திக்கவில்லை என்ற விவாதங்கள் தமிழக அரசியல் களத்தில் கிளம்பின.
இதுகுறித்துச் சென்னை விமான நிலையத்தில் செய்தியாளர்களைச் சந்தித்து அகில இந்திய வல்லுநர்கள் காங்கிரஸ் தலைவர் பிரவீன் சக்கரவர்த்தி அளித்த விளக்கத்தின் விபரம் பின்வருமாறு:
எங்கள் தரப்பில் புகாரே இல்லை: “டெல்லி சென்றிருந்த தமிழ்நாடு முதலமைச்சர் விஜய், காங்கிரஸ் கட்சி மூத்த தலைவர்களைச் சந்திக்கவில்லை என எங்கள் தரப்பில் இருந்து எவ்விதக் குற்றச்சாட்டோ அல்லது வருத்தமோ எழவில்லை. இது யார் கிளப்பிவிட்ட குற்றச்சாட்டு என்றும் எங்களுக்குத் தெரியவில்லை. மேலும், டெல்லியில் ராகுல் காந்தியை முதல்வர் விஜய் சந்திக்க உள்ளார் என்ற அதிகாரப்பூர்வத் தகவலையும் காங்கிரஸ் தரப்பில் நாங்கள் எங்கும் வெளியிடவில்லை.”
அடுத்த முறை நிச்சயம் சந்திப்பு: “டெல்லி சென்றிருந்த முதலமைச்சருக்குப் பிரதமர் மோடி மற்றும் நிதி அமைச்சர் நிர்மலா சீதாராமன் ஆகியோருடனான சந்திப்புகளே மிக முக்கிய அரசு முறைப் பணியாக இருந்தது. மேலும், நேற்று மாலை 6 மணிக்கு மேல் காங்கிரஸ் மூத்த தலைவர் ராகுல் காந்திக்கு இதர அலுவல் காரணமாக நேரமில்லை, இதன் காரணமாகவே இந்தச் சந்திப்பு தற்பொழுது சாத்தியமில்லாமல் போனது. இதில் எவ்வித உள்நோக்கமும் இல்லை. முதலமைச்சர் விஜய் முதல்வராகப் பதவியேற்ற விழாவிற்கு ராகுல் காந்தியே நேரில் வருகை தந்திருந்தார். எனவே, அடுத்த முறை விஜய் டெல்லி செல்லும்போது நிச்சயம் ராகுல் காந்தியைச் சந்தித்து ஆலோசனை நடத்துவார்.”
திருச்செந்தூர் முருகன் கோவிலில் முகமூடி அணிந்து ஆய்வு செய்த அறநிலையத்துறை அமைச்சர் ரமேஷிடம் அர்ச்சகர் லஞ்சம் கேட்டுச் சிக்கியுள்ள விவகாரமும், முன்னாள் அமைச்சர் சி.விஜயபாஸ்கர் தவெக இணைப்பு குறித்துச் செய்தியாளர்களிடம் மழுப்பலாகப் பதிலளித்துள்ள அரசியல் பரபரப்புகளும் நிலவி வரும் தற்போதைய சூழ்நிலையில், டெல்லி அப்பாயிண்ட்மென்ட் விவகாரத்திற்குத் தற்பொழுது காங்கிரஸ் தரப்பு அளித்துள்ள இந்த விளக்கம் அரசியல் மேடைகளில் விவாதப் பொருளாக மாறியுள்ளது.
