செங்கல்பட்டு மாவட்டம் கல்பாக்கத்தில் செயல்பட்டு வரும் சென்னை அணுமின் நிலையத்தில் (MAPS) தொழில் பழகுநர் (Apprentice) பயிற்சிக்கான விண்ணப்பங்கள் வரவேற்கப்படுவதாக அணுமின் நிலைய நிர்வாகம் அறிவித்துள்ளது. ஐ.டி.ஐ., டிப்ளமோ மற்றும் பட்டப்படிப்பு முடித்த இளைஞர்களுக்கு இது சிறந்த வாய்ப்பாக அமைந்துள்ளது.
இந்திய அணுமின் கழகத்தின் (NPCIL) கட்டுப்பாட்டில் இயங்கும் சென்னை அணுமின் நிலையம், ஆண்டுதோறும் தொழில்நுட்ப மற்றும் பட்டதாரி இளைஞர்களுக்கு தொழில் அனுபவம் பெறும் வகையில் அப்ரன்டிஸ் பயிற்சிகளை வழங்கி வருகிறது. அதன்படி, 2026-ஆம் ஆண்டுக்கான பயிற்சி திட்டத்திற்கான ஆட்சேர்ப்பு தற்போது தொடங்கப்பட்டுள்ளது.
இந்த பயிற்சி திட்டத்தின் கீழ், ஐ.டி.ஐ. முடித்த 142 பேருக்கு பல்வேறு தொழில்நுட்பப் பிரிவுகளில் அப்ரன்டிஸ் பயிற்சி வழங்கப்பட உள்ளது. மேலும், பட்டப்படிப்பு முடித்த 16 பேருக்கு மனிதவள மேம்பாடு உள்ளிட்ட நிர்வாக மற்றும் தொழில்முறை பயிற்சிகள் அளிக்கப்பட உள்ளன.
இந்த பயிற்சிகள் மூலம் மாணவர்கள் மற்றும் இளைஞர்கள் தொழில்துறை அனுபவத்தை பெறுவதுடன், எதிர்கால வேலைவாய்ப்புகளுக்கான திறன்களையும் மேம்படுத்திக் கொள்ள முடியும். அணுசக்தி துறையில் பணியாற்ற விரும்பும் இளைஞர்களுக்கு இந்த வாய்ப்பு மிகவும் பயனுள்ளதாக கருதப்படுகிறது.
விண்ணப்பிக்க விரும்புவோர் தகுதி, காலியிட விவரங்கள் மற்றும் தேர்வு நடைமுறைகள் உள்ளிட்ட முழுமையான தகவல்களை இந்திய அணுமின் கழகத்தின் அதிகாரப்பூர்வ இணையதளமான https://www.npcil.nic.in-ல் அறிந்து கொள்ளலாம்.
இந்த பயிற்சிக்கான விண்ணப்பங்களை சமர்ப்பிக்க கடைசி தேதி ஜூன் 30, 2026 என அறிவிக்கப்பட்டுள்ளது. தகுதியான விண்ணப்பதாரர்கள் கடைசி தேதிக்கு முன்பாக விண்ணப்பிக்குமாறு சென்னை அணுமின் நிலைய நிர்வாகம் கேட்டுக்கொண்டுள்ளது.
