செங்கல்பட்டு மாவட்டத்தில் நாளை (மே 4) நடைபெறவுள்ள வாக்கு எண்ணிக்கையை முன்னிட்டு, காவல்துறையினர் இன்று அதிரடி அணிவகுப்பு நடத்தினர்.
தமிழகத்தில் 234 சட்டமன்ற தொகுதிகளுக்கான வாக்குப்பதிவு ஏப்ரல் 23ஆம் தேதி நடைபெற்ற நிலையில், வாக்கு எண்ணிக்கை நாளை நடைபெற உள்ளது. செங்கல்பட்டு மாவட்டத்தில் உள்ள 7 தொகுதிகளுக்கான எண்ணிக்கை 3 மையங்களில் நடைபெறுகிறது. இதில், செங்கல்பட்டு மற்றும் திருப்போரூர் தொகுதிகளுக்கான வாக்கு எண்ணிக்கை ஆத்தூரில் உள்ள சமூக மேம்பாட்டிற்கான ஒருங்கிணைந்த பயிற்சி மையத்தில் நடைபெறுகிறது.
வாக்கு எண்ணிக்கையின் போது சட்டம் ஒழுங்கை பேணும் வகையில் காவல்துறை பலத்த பாதுகாப்பு ஏற்பாடுகளை செய்துள்ளது. இதன் ஒரு பகுதியாக, செங்கல்பட்டு நகரம் மற்றும் சுற்றுவட்டாரங்களில் காவல்துறையினர் அணிவகுப்பு நடத்தி எச்சரிக்கை விடுத்தனர்.
மேலும், வாக்கு எண்ணிக்கை மையங்களில் மூன்றடுக்கு பாதுகாப்பு ஏற்பாடு செய்யப்பட்டுள்ளதுடன், 24 மணி நேரமும் சிசிடிவி கண்காணிப்பு நடைபெற்று வருகிறது. நாளை காலை 8 மணி முதல் வாக்கு எண்ணிக்கை தொடங்க உள்ள நிலையில், முழு பகுதியும் போலீஸ் கட்டுப்பாட்டில் கொண்டு வரப்பட்டுள்ளது.
#Chengalpattu #VoteCounting #PoliceParade #Election2026 #TamilNadu #BreakingNews #Security
