செங்கல்பட்டு மாவட்டத்தில் தீ விபத்துகளைத் தடுக்கவும், அவசரகால மீட்புப் பணிகளை மேலும் வலுப்படுத்தவும் தீயணைப்பு மற்றும் மீட்புப் பணிகள் துறை சார்பில் தீயணைப்பு பாதுகாப்பு குறித்த ஆய்வு கூட்டம் நடைபெற்றது.
செங்கல்பட்டு மாவட்ட ஆட்சியர் அலுவலக கூட்டரங்கில் நேற்று (ஜூன் 3) நடைபெற்ற இந்த ஆய்வு கூட்டத்திற்கு மாவட்ட ஆட்சியர் வீரப்பன் தலைமை தாங்கினார். கூட்டத்தில் மாவட்ட காவல் கண்காணிப்பாளர் அய்மன் ஜமால், மாவட்ட வருவாய் அலுவலர் கணேஷ்குமார், மாவட்ட உதவி தீயணைப்புத் துறை அலுவலர் செந்தில்குமரன் உள்ளிட்ட அதிகாரிகள் மற்றும் பல்வேறு துறைகளைச் சேர்ந்த அலுவலர்கள் கலந்து கொண்டனர்.
கூட்டத்தில் மாவட்டத்தின் பல்வேறு பகுதிகளில் தீயணைப்பு பாதுகாப்பு ஏற்பாடுகள், தொழிற்சாலைகள் மற்றும் வணிக வளாகங்களில் பின்பற்றப்பட வேண்டிய பாதுகாப்பு நடைமுறைகள், பொதுமக்களிடையே விழிப்புணர்வு ஏற்படுத்தும் நடவடிக்கைகள் உள்ளிட்டவை குறித்து விரிவாக ஆலோசிக்கப்பட்டது.
மேலும், தீ விபத்து ஏற்படும் சூழல்களில் உடனடி மீட்பு நடவடிக்கைகளை மேற்கொள்வது, அவசரகால பதிலளிப்பு திறனை மேம்படுத்துவது மற்றும் தீயணைப்பு உபகரணங்களின் செயல்திறனை தொடர்ந்து கண்காணிப்பது குறித்து அதிகாரிகளுக்கு அறிவுறுத்தல்கள் வழங்கப்பட்டன.
அரசு அலுவலகங்கள், கல்வி நிறுவனங்கள், வணிக வளாகங்கள் மற்றும் மக்கள் அதிகம் கூடும் இடங்களில் தீயணைப்பு பாதுகாப்பு விதிகளை முறையாக பின்பற்ற வேண்டும் என்றும், பாதுகாப்பு ஆய்வுகளை தொடர்ந்து மேற்கொள்ள வேண்டும் என்றும் அதிகாரிகள் வலியுறுத்தினர்.
மாவட்டத்தில் பொதுமக்களின் உயிர் மற்றும் உடைமைகளை பாதுகாக்க அனைத்து துறைகளும் ஒருங்கிணைந்து செயல்பட வேண்டியதன் அவசியம் குறித்தும் கூட்டத்தில் விவாதிக்கப்பட்டது.
