“பயமறியாதவர்களுக்கு எல்லையே இல்லை!” – ‘Army of Dheeran Annamalai’ போஸ்டர்கள்!

தமிழக அரசியல் களம் எப்போதுமே பரபரப்பாகக் காணப்படும் கோயம்புத்தூரில், பா.ஜ.க மையக்குழுவின் மிக முக்கிய ஆலோசனைக் கூட்டம் காரசாரமாக நடந்து வரும் இதே வேளையில், நகரம் முழுவதும் ஒட்டப்பட்டுள்ள பா.ஜ.க மூத்த தலைவர் அண்ணாமலையின் அதிரடி ஆதரவு போஸ்டர்கள் தற்பொழுது ஒட்டுமொத்த அரசியல் வட்டாரத்திலும் “ஹாட் டாபிக்” ஆக மாறிப் பெரும் விவாதத்தைக் கிளப்பியுள்ளது.

கோவை மாவட்ட பா.ஜ.க தலைமை அலுவலகத்தில், கட்சியின் முக்கிய நிர்வாகிகள், அணி பொறுப்பாளர்கள், மாவட்ட தலைவர்கள் மற்றும் நடந்து முடிந்த சட்டமன்றத் தேர்தலில் களம் கண்ட வேட்பாளர்கள் கலந்து கொண்ட உள்கட்சி ஆலோசனைக் கூட்டம் நேற்று மற்றும் இன்று என இரண்டு நாட்களாகத் தீவிரமாக நடைபெற்றது. இந்த முக்கியத்துவம் வாய்ந்த ஆலோசனைக் கூட்டம் ஒருபுறம் நடந்து கொண்டிருக்க, தற்பொழுது உயர்கல்வி மற்றும் உத்திசார் பணிகளுக்காக வெளிநாட்டில் (லண்டன்) தங்கியிருக்கும் அண்ணாமலை இந்த கூட்டத்தில் நேரடியாகப் பங்கேற்கவில்லை. அவர் தமிழகத்தில் இல்லாத இந்தச் சூழலிலும், அவரது தீவிர ஆதரவாளர்கள் கோவை நகரின் பல்வேறு முக்கிய வீதிகளிலும், சந்திப்புகளிலும் ஒட்டியுள்ள பிரம்மாண்ட சுவரொட்டிகள் தான் தற்பொழுது “நெட்டிசன்”கள் மற்றும் மாற்று அரசியல் கட்சிகளின் கவனத்தை ஈர்த்து வருகிறது.

“Fearless Minds Have No Limits” — அதாவது “பயமறியாதவர்களுக்கு எல்லையே கிடையாது” என்ற அதிரடியான ஆங்கில வாசகத்துடன், அண்ணாமலையின் கம்பீரமான புகைப்படமும் அந்த போஸ்டர்களில் இடம் பெற்றுப் பொதுமக்களையும் திரும்பிப் பார்க்க வைத்துள்ளது. மேலும், இந்த சுவரொட்டிகளின் கீழே “Army of Dheeran Annamalai” (தீரன் அண்ணாமலை படை) என்ற பெயரில் வெளியிடப்பட்டிருப்பது தான் கோவை அரசியலில் புதிய புயலைக் கிளப்பியுள்ளது. அண்ணாமலை ஊரில் இல்லாத நேரத்திலும், அவரது ஆதரவுப் பட்டாளம் கோவை மாநகர வீதிகளில் இத்தகைய போஸ்டர்களை ஒட்டி தங்களது பலத்தைக் காட்டியிருப்பது, பா.ஜ.க உள்கட்சிக்கு உள்ளேயே ஒரு புதிய அரசியல் சிக்னலை அல்லது புதிய கணக்கை உணர்த்துகிறதா? என்ற மில்லியன் டாலர் கேள்வியைக் கட்சி வட்டாரத்தில் உருவாக்கியுள்ளது.