நடிகர் சூர்யா நடிப்பில், ஆர்.ஜே.பாலாஜி இயக்கத்தில் பெரும் எதிர்பார்ப்பைக் கிளப்பியுள்ள ‘கருப்பு’ திரைப்படத்தின் தொடக்கக் காலச் சிறப்பு காட்சிகளுக்குத் தமிழக அரசு அதிகாரப்பூர்வமாக அனுமதி அளித்துள்ளது. இதனால் சூர்யா ரசிகர்கள் உற்சாகத்தின் உச்சத்தில் உள்ளனர்.
தமிழக முதலமைச்சர் ஜோசப் விஜய் தலைமையிலான புதிய அரசு பொறுப்பேற்ற பிறகு, திரையுலகினரின் கோரிக்கையை ஏற்று ஒரு பெரிய படத்திற்குச் சிறப்பு காட்சி அனுமதி வழங்கப்படுவது இதுவே முதல் முறையாகும். வரும் மே 14-ஆம் தேதி உலகம் முழுவதும் வெளியாகவுள்ள ‘கருப்பு’ திரைப்படத்திற்கு இந்த அதிரடிச் சலுகை கிடைத்துள்ளது.
படக்குழுவினர் விடுத்த வேண்டுகோளைப் பரிசீலித்த தமிழக அரசு, இதற்கான அரசாணையை இன்று வெளியிட்டது. வரும் மே 14 மற்றும் மே 15 ஆகிய இரண்டு தேதிகளில் மட்டும் வழக்கமான காட்சிகளுடன் கூடுதலாக ஒரு காட்சியை (Special Show) திரையிட அனுமதி வழங்கப்பட்டுள்ளது. இந்தச் சிறப்பு காட்சிகளைக் காலை 9 மணி முதல் நள்ளிரவு 2 மணிக்குள் எந்த நேரத்தில் வேண்டுமானாலும் திரையரங்கு உரிமையாளர்கள் திரையிட்டுக் கொள்ளலாம் எனத் தெரிவிக்கப்பட்டுள்ளது.
சூர்யா முதல்முறையாக ஆர்.ஜே.பாலாஜி இயக்கத்தில் நடித்துள்ளதால், இந்தப் படத்தின் மீது ஆரம்பத்திலிருந்தே பெரும் எதிர்பார்ப்பு நிலவி வருகிறது. ஒரு காட்சி கூடுதலாகத் திரையிட அரசு அனுமதித்துள்ளதால், டிக்கெட் முன்பதிவு இப்போதே விறுவிறுப்படைந்துள்ளது. சினிமாத்துறையைச் சேர்ந்த ஒருவரே முதலமைச்சராக இருக்கும் சூழலில், திரையுலகின் கோரிக்கைக்குத் துரிதமாகப் பதில் கிடைத்திருப்பது கோலிவுட் வட்டாரத்தில் ஆரோக்கியமான நகர்வாகப் பார்க்கப்படுகிறது.
சிறப்பு காட்சிகளின் போது திரையரங்குகளில் கூட்ட நெரிசலைக் கட்டுப்படுத்தவும், பாதுகாப்பு விதிகளைப் பின்பற்றவும் காவல்துறைக்கு அறிவுறுத்தப்பட்டுள்ளது. மேலும், நிர்ணயிக்கப்பட்ட கட்டணத்தை விடக் கூடுதல் கட்டணம் வசூலிக்கக் கூடாது என்றும் திரையரங்கு உரிமையாளர்களுக்கு எச்சரிக்கை விடுக்கப்பட்டுள்ளது.
