தென்காசி மாவட்டம் நெட்டூர் பகுதியில் பட்டியலின மக்கள்மீது நடைபெற்றதாக கூறப்படும் கொலைவெறித் தாக்குதலை கண்டித்து, தமிழ்நாடு தீண்டாமை ஒழிப்பு முன்னணி சார்பில் செங்கல்பட்டில் கண்டன ஆர்ப்பாட்டம் நடைபெற்றது.
செங்கல்பட்டு பெரியார் சிலை முன்பு நேற்று (ஜூன் 4) மாலை 6 மணியளவில் நடைபெற்ற இந்த ஆர்ப்பாட்டத்தில், சமூக அமைப்புகள் மற்றும் பொதுமக்கள் கலந்து கொண்டு தாக்குதலுக்கு எதிராக கண்டனங்களை தெரிவித்தனர்.
ஆர்ப்பாட்டத்தில் பேசியவர்கள், நெட்டூரில் நடைபெற்ற தாக்குதல் சம்பவத்தில் தொடர்புடைய குற்றவாளிகள் மீது கடுமையான சட்ட நடவடிக்கை எடுக்க வேண்டும் என வலியுறுத்தினர். குறிப்பாக, சம்பந்தப்பட்டவர்களை எஸ்.சி./எஸ்.டி. வன்கொடுமை தடுப்புச் சட்டம் மற்றும் குண்டர் தடுப்புச் சட்டத்தின் கீழ் கைது செய்ய வேண்டும் என்று கோரிக்கை விடுத்தனர்.
மேலும், தாக்குதலால் பாதிக்கப்பட்ட குடும்பங்களுக்கு அரசு உரிய நிவாரண உதவிகளை வழங்க வேண்டும் என்றும், அவர்களின் பாதுகாப்பை உறுதி செய்ய வேண்டும் என்றும் வலியுறுத்தப்பட்டது.
போராட்டத்தின் போது தாக்குதலை கண்டித்து கோஷங்கள் எழுப்பப்பட்டதுடன், சமூக நீதி மற்றும் சமத்துவத்தை பாதுகாக்க அரசு நடவடிக்கை எடுக்க வேண்டும் என வலியுறுத்தப்பட்டது.
இந்த ஆர்ப்பாட்டம் அமைதியான முறையில் நடைபெற்ற நிலையில், அப்பகுதியில் போலீசார் பாதுகாப்பு பணியில் ஈடுபட்டிருந்தனர்.
