மத்திய கிழக்கு ஆசியாவில் நிலவும் போர்ச் சூழலுக்கு இடையே, இந்தியாவின் எரிசக்தி பாதுகாப்பை உறுதி செய்யவும், ஐரோப்பிய நாடுகளுடனான வர்த்தக உறவை வலுப்படுத்தவும் பிரதமர் நரேந்திர மோடி வரும் மே 15 முதல் 5 நாடுகளுக்கு அரசு முறைப் பயணம் மேற்கொள்கிறார்.
பிரதமர் நரேந்திர மோடி வரும் மே 15 முதல் மே 20 வரை 6 நாட்கள் சுற்றுப்பயணமாக ஐக்கிய அரபு எமிரேட்ஸ் (UAE), நெதர்லாந்து, ஸ்வீடன், நார்வே மற்றும் இத்தாலி ஆகிய நாடுகளுக்குச் செல்ல உள்ளார். இந்தப் பயணத்தின் போது எரிசக்தி, பாதுகாப்பு, தொழில்நுட்பம் மற்றும் வர்த்தகம் ஆகிய துறைகளில் முக்கிய ஒப்பந்தங்கள் கையெழுத்தாகும் என எதிர்பார்க்கப்படுகிறது.
பிரதமரின் இந்தப் பயணம் மே 15 அன்று ஐக்கிய அரபு எமிரேட்ஸில் தொடங்குகிறது. அங்கு அவர் அதிபர் ஷேக் முகமது பின் சயீத் அல் நஹ்யானைச் சந்தித்து இருதரப்பு உறவுகள் குறித்துப் பேசுகிறார்.
அங்கிருந்து நெதர்லாந்து செல்லும் பிரதமர், அந்நாட்டுப் பிரதமர் ராப் ஜெட்டனைச் (Rob Jetten) சந்தித்து, செமிகண்டக்டர் (Semiconductor) உற்பத்தி மற்றும் பசுமை ஹைட்ரஜன் துறைகளில் ஒத்துழைப்பு குறித்து ஆலோசிக்கிறார்.
ஸ்வீடனில் இருதரப்பு பேச்சுவார்த்தைகளை முடித்துக்கொண்டு, மே 19 அன்று நார்வே தலைநகர் ஆஸ்லோவில் நடைபெறவுள்ள ‘3-வது இந்தியா-நோர்டிக்’ (India-Nordic Summit) உச்சிமாநாட்டில் பிரதமர் பங்கேற்கிறார். இதில் டென்மார்க், பின்லாந்து, ஐஸ்லாந்து, நார்வே மற்றும் ஸ்வீடன் நாட்டுத் தலைவர்கள் கலந்து கொள்கின்றனர்.
பயணத்தின் இறுதிப் பகுதியாக இத்தாலி செல்லும் மோடி, அந்நாட்டுப் பிரதமர் ஜார்ஜியா மெலோனியைச் சந்தித்து இந்தியா-ஐரோப்பிய யூனியன் இடையிலான தடையற்ற வர்த்தக ஒப்பந்தம் (FTA) குறித்துப் பேசுகிறார்.
மத்திய கிழக்கில் நிலவும் போர் பதற்றத்தால் இந்தியாவின் கச்சா எண்ணெய் மற்றும் எரிவாயு விநியோகத்தில் பாதிப்பு ஏற்படாமல் இருப்பதை உறுதி செய்வதே இந்தப் பயணத்தின் முக்கிய நோக்கமாகும். ஐக்கிய அரபு எமிரேட்ஸ் மற்றும் நார்வே போன்ற நாடுகளுடனான எரிசக்தி ஒப்பந்தங்கள் இந்தியாவின் தேவையைப் பூர்த்தி செய்ய உதவும்.
இந்த 5 நாட்டுச் சுற்றுப்பயணம் உலக அரங்கில் இந்தியாவின் ராஜதந்திர ரீதியிலான முக்கியத்துவத்தை மேலும் அதிகரிக்கும் என எதிர்பார்க்கப்படுகிறது. குறிப்பாக, செமிகண்டக்டர் மற்றும் பசுமை எரிசக்தித் துறையில் இந்தியாவின் வளர்ச்சிக்கு இது ஒரு மைல்கல்லாக அமையும். பிரதமரின் இந்தப் பயணம் குறித்து உங்கள் கருத்து என்ன?
