தமிழகம் முழுவதும் கோடை விடுமுறை முடிந்து ஜூன் மாதம் பள்ளிகள் திறக்கப்பட உள்ள நிலையில், பள்ளி மாணவ, மாணவிகளின் பாதுகாப்பை உறுதி செய்யும் பொருட்டுப் தனியார் பள்ளிப் பேருந்துகள் மற்றும் வேன்களின் தரம் குறித்த மாபெரும் கூட்டாய்வு தீவிரமாக நடைபெற்றது. இதில் மோட்டார் வாகன ஆய்வாளர் ஜெயலட்சுமி நேரடியாகப் பேருந்தை ஓட்டிப் பார்த்து தரம் குறித்து அதிரடிச் சோதனை நடத்தினார்.
பள்ளிப் பருவக் குழந்தைகள் பாதுகாப்பான முறையில் பள்ளிக்குச் சென்று வருவதை உறுதி செய்யும் வகையில், தமிழக அரசின் போக்குவரத்துத் துறை உத்தரவின் பேரில் மாநிலம் முழுவதும் பள்ளி வாகனங்களின் வருடாந்திரத் தகுதிச் சான்று (FC) சரிபார்ப்புப் பணிகள் முடுக்கிவிடப்பட்டுள்ளன. அதன் ஒரு பகுதியாக, செங்கல்பட்டு மாவட்டத்தில் உள்ள பள்ளி வாகனங்களுக்கான தரப் பரிசோதனை முகாம் மாவட்ட ஆட்சியர் மாலதி ஹெலன் தலைமையில், வருவாய் கோட்டாட்சியர் ரம்யா மற்றும் வட்டாரப் போக்குவரத்து அலுவலர் (RTO) இளங்கோவன் ஆகியோர் முன்னிலையில் அதிரடியாக நடைபெற்றது.
இந்த மெகா பாதுகாப்பு ஆய்வின் போது, பள்ளி வாகனங்களின் அஸ்திவாரம் முதல் உதிரிப் பாகங்கள் வரை அனைத்தும் அலசி ஆராயப்பட்டன. குறிப்பாக, பேருந்துகளின் பிரேக் சிஸ்டம் துல்லியமாகச் செயல்படுகிறதா, மேற்கூரை மற்றும் தரைப்பகுதிகளில் துருப்பிடித்து ஏதேனும் ஓட்டைகள் விழுந்து ஆபத்தான நிலையில் உள்ளதா, முகப்பு விளக்குகள் மற்றும் இண்டிகேட்டர்கள் முறையாக எரிகிறதா, படிக்கட்டுகளின் உயரம், கதவுகள் மற்றும் இருக்கைகளின் தரம் சான்றிதழ் விதிகளின்படி உள்ளதா எனப் பல கட்டங்களாகச் சோதனைகள் நடத்தப்பட்டன. மாவட்ட ஆட்சியர் மாலதி ஹெலன் நேரடியாகப் பள்ளிப் பேருந்துகளுக்குள் ஏறி, மாணவ, மாணவிகளின் பாதுகாப்பு வசதிகளை நேரில் பார்வையிட்டு ஆய்வு செய்தார்.
செங்கல்பட்டு, மதுராந்தகம், திருக்கழுக்குன்றம் உள்ளிட்ட சுற்றுவட்டாரப் பகுதிகளில் செயல்பட்டு வரும் சுமார் 432 தனியார் பள்ளி வாகனங்கள் இந்த முகாமிற்கு வரவழைக்கப்பட்டுச் சோதனைக்கு உட்படுத்தப்பட்டன. இதில் முறையாகப் பராமரிக்கப்படாத மற்றும் பாதுகாப்பு விதிகளை மீறிய 30 வாகனங்களில் கடுமையான குறைபாடுகள் கண்டறியப்பட்டு, அவற்றின் உரிமம் தற்காலிகமாக நிறுத்தி வைக்கப்பட்டதுடன், தகுந்த பழுதுநீக்கப் பணிகளுக்குப் பின் மறு ஆய்வுக்கு உட்படுத்த அதிகாரிகளுக்கு உத்தரவிடப்பட்டது. இந்த ஆய்வின் போது, ஆபத்துக் காலங்களில் பேருந்தின் அவசர வழிக் கதவை (Emergency Exit) எப்படித் திறப்பது, ஆபத்துச் சூழலை ஓட்டுநரிடம் எப்படித் தெரிவிப்பது என்பது குறித்து பள்ளி குழந்தைகளுக்குப் புரியும் வகையில், பேருந்தின் உட்புறச் சுவர்களில் ஓவியங்களாக வரைந்து விழிப்புணர்வு ஏற்படுத்த வேண்டும் என ஆட்சியர் அறிவுறுத்தினார்.
ஆய்வின் முத்தாய்ப்பாக, வாகனங்களின் பிரேக் மற்றும் கியர் செயல்பாடுகளைத் துல்லியமாகக் கண்டறியும் பொருட்டு, மோட்டார் வாகன ஆய்வாளர் (MVI) ஜெயலட்சுமி தானே ஓட்டுநர் இருக்கையில் அமர்ந்து, பள்ளிப் பேருந்தை நேரில் இயக்கிப் பார்த்து (Test Drive) அதிரடித் தணிக்கை செய்தார். பெண் அதிகாரி ஒருவர் கறாரான விதிகளுடன் பேருந்தை ஓட்டிப் பார்த்துத் தரம் சோதித்த இந்த அதிரடி ஆக்ஷன், பள்ளி நிர்வாகங்கள் மற்றும் ஓட்டுநர்கள் மத்தியில் பெரும் பரபரப்பை ஏற்படுத்தியதோடு, பெற்றோர்கள் மத்தியில் நிம்மதியையும் ஏற்படுத்தியுள்ளது.
