தமிழகச் சட்டமன்றத் தேர்தல் முடிவுகளுக்குப் பிந்தைய அரசியல் குழப்பங்களுக்கு இடையில், தமிழக வெற்றிக் கழகம் (தவெக) ஆட்சி அமைப்பதற்கு திமுக எந்தவித இடையூறும் தராது என அக்கட்சியின் தலைவரும் முதலமைச்சருமான மு.க.ஸ்டாலின் அறிவித்துள்ளார்.
ஆங்கில நாளிதழ் ஒன்றுக்குப் பேட்டியளித்த மு.க.ஸ்டாலின், தமிழகத்தில் நிலவும் தற்போதைய அரசியல் சூழல் குறித்துத் தனது நிலைப்பாட்டைத் தெளிவுபடுத்தியுள்ளார். தமிழக மக்கள் அளித்துள்ள தீர்ப்பின்படி, தனிப்பெரும் கட்சியாக உருவெடுத்துள்ள தவெக ஆட்சி அமைப்பதில் திமுக முட்டுக்கட்டையாக இருக்காது.
மாநிலத்தில் அரசியலமைப்புச் சட்ட நெருக்கடி ஏற்படுவதையோ அல்லது மிகக்குறுகிய காலத்தில் மற்றொரு தேர்தலைச் சந்திப்பதையோ திமுக விரும்பவில்லை. ஆட்சி அமைக்க உரிமை கோருவதில் ஆளுநர் தாமதம் காட்டி வரும் சூழலில், பிரதான எதிர்க்கட்சியாக உருவெடுத்துள்ள திமுகவின் இந்த அறிவிப்பு விஜய்க்குப் பெரிய நிம்மதியைத் தந்துள்ளதாகக் கருதப்படுகிறது.
ஏற்கனவே அதிமுக தரப்பு தவெக-விற்குத் தனது ஆதரவை மறுத்துள்ள நிலையில், முதலமைச்சர் மு.க.ஸ்டாலினின் இந்த “இடையூறு செய்யமாட்டோம்” என்ற அறிவிப்பு தவெக-வினர் மத்தியில் நம்பிக்கையை ஏற்படுத்தியுள்ளது.
“இடையூறு செய்ய மாட்டோம்” என்பது, ஒருவேளை சட்டமன்றத்தில் நம்பிக்கை வாக்கெடுப்பு நடைபெறும் போது திமுக வெளிநடப்பு செய்து, தவெக தனது பெரும்பான்மையை நிரூபிக்க மறைமுகமாக உதவும் என்பதைக் குறிக்கிறதா என்ற விவாதங்களும் தொடங்கியுள்ளன.
ஆளுநர் மாளிகையில் விஜய் சமர்ப்பிக்க வேண்டிய 118 எம்.எல்.ஏ-க்களின் ஆதரவு கடிதம் தொடர்பான இழுபறி நீடிக்கும் வேளையில், திமுகவின் இந்த முடிவு தமிழக அரசியலில் நிலவி வந்த பதற்றத்தைச் சற்றுத் தணித்துள்ளது.
