நவீனத் தொழில்நுட்பப் புரட்சிக்கு ஏற்ப வாகனப் பதிவு முறைகளில் மத்திய அரசு கொண்டு வந்துள்ள அதிரடி மாற்றங்கள் தற்போது அமலுக்கு வரத் தொடங்கியுள்ளன. இதன்படி, அனைத்து வாகனங்களிலும் உயர் பாதுகாப்பு பதிவு எண் பலகை (HSRP – High-Security Registration Plate) பொருத்தப்பட்டிருப்பது கட்டாயமாக்கப்பட்டுள்ளது. இதனை மீறும் வாகன உரிமையாளர்களுக்குப் போக்குவரத்துத் துறை ரூ. 10,000 வரை அபராதம் விதிக்கப்படும் என அதிரடி எச்சரிக்கை விடுத்துள்ளது.
வாகனத் திருட்டைத் தடுக்கவும், குற்றச்செயல்களில் ஈடுபடும் வாகனங்களை லேசர் குறியீடு மூலம் எளிதாகக் கண்டறியவும் இந்த HSRP முறை அறிமுகப்படுத்தப்பட்டது. இதில் தனித்துவமான அடையாள எண்கள், எரிபொருள் வகையைக் குறிக்கும் ஸ்டிக்கர்கள் மற்றும் போலி செய்ய முடியாத ஹாலோகிராம் போன்ற பாதுகாப்பு அம்சங்கள் உள்ளன. ஏப்ரல் 1, 2019-க்குப் பிறகு வாங்கப்பட்ட வாகனங்களுக்கு டீலர்களே இதனைப் பொருத்தித் தருகின்றனர். ஆனால், அதற்கு முன்பு வாங்கப்பட்ட பழைய வாகன உரிமையாளர்கள் தாங்களாகவே முன்வந்து இதனை அப்டேட் செய்ய வேண்டியது அவசியமாகும்.
அண்டை மாநிலங்களைத் தொடர்ந்து பல்வேறு மாநிலங்களில் இது தீவிரப்படுத்தப்பட்டுள்ள நிலையில், HSRP நம்பர் பிளேட் இல்லாத வாகனங்களுக்குப் புகை பரிசோதனைச் சான்றிதழ் (PUC Certificate) வழங்கப்பட மாட்டாது என்று அறிவிக்கப்பட்டுள்ளது. ஒருவேளை சாலைகளில் செல்லும் போது பிடிபட்டால், முதல் முறை ரூ. 5,000 அபராதமும், இரண்டாவது முறை சிக்கினால் ரூ. 10,000 வரை அபராதமும் விதிக்கப்படும். தற்போது பெட்ரோல் பங்குகள் மற்றும் சாலைகளில் உள்ள கேமராக்கள் மூலம் தானியங்கி முறையில் வாகனங்களை ஸ்கேன் செய்து ஆன்லைன் வழியிலேயே அபராதம் (E-Challan) அனுப்பும் பணிகள் முடுக்கிவிடப்பட்டுள்ளன.
வாகன உரிமையாளர்கள் தேவையற்ற அலைச்சலைத் தவிர்க்க https://www.bookmyhsrp.com/ என்ற அதிகாரப்பூர்வ இணையதளத்தில் ஆன்லைன் மூலம் விண்ணப்பிக்கலாம். இருசக்கர வாகனங்களுக்கு ரூ. 200 முதல் ரூ. 500 வரையிலும், நான்கு சக்கர வாகனங்களுக்கு ரூ. 600 முதல் ரூ. 1,500 வரையிலும் மட்டுமே கட்டணம் வசூலிக்கப்படுகிறது. தமிழ்நாட்டில் இன்னும் இது முழுமையாகக் கட்டாயமாக்கப்படவில்லை என்றாலும், மற்ற மாநிலங்களுக்குப் பயணம் செய்வோர் மற்றும் பாதுகாப்பு கருதி பழைய வாகனங்களை வைத்திருப்பவர்கள் முன்கூட்டியே மாற்றிக்கொள்வது புத்திசாலித்தனமாகும்.
