சென்னையிலிருந்து கேரளா மாநிலம் குருவாயூர் நோக்கிச் சென்ற விரைவு ரயில், மதுராந்தகம் அருகே சிக்னல் பழுது காரணமாக நடுவழியில் அவசரமாக நிறுத்தப்பட்டது. சுமார் அரை மணி நேரக் காத்திருப்பிற்குப் பின், ரயில் ஓட்டுநரே (Loco Pilot) சிக்னல் கம்பத்தின் அருகே நேரில் சென்று மேனுவல் முறையில் கோளாறைச் சரிசெய்து ரயிலை இயக்கிய மாஸ் சம்பவம் அரங்கேறியுள்ளது.
செங்கல்பட்டு மாவட்டம் மதுராந்தகம் அருகே உள்ள பாக்கம் என்கிற கிராமப் பகுதியில் இன்று மதியம் இந்த எதிர்பாராத ரயில் தாமதச் சம்பவம் நிகழ்ந்துள்ளது. சென்னையிலிருந்து பயணிகளுடன் கேரளா நோக்கிப் புறப்பட்ட குருவாயூர் எக்ஸ்பிரஸ் ரயில் (Guruvayur Express), பாக்கம் ரயில் நிலையத்தைக் கடக்க முயன்றபோது அங்கிருந்த ஆட்டோமேட்டிக் சிக்னல் திடீரென சிவப்பு நிறமாகக் காட்டியுள்ளது.
ஆட்டோமேட்டிக் சிக்னல் கம்பத்தில் ஏற்பட்ட திடீர் தொழில்நுட்பக் கோளாறு (Signal Fault) காரணமாக, அந்தப் பகுதியில் மேற்கொண்டு ரயிலை இயக்க முடியாமல் ஓட்டுநர் ரயிலை நடுவழியிலேயே அவசரமாக நிறுத்தினார். நடுவழியில் ரயில் நிறுத்தப்பட்டதால், கடும் வெயிலில் சிக்கிய பயணிகள் என்ன நடக்கிறது என்று தெரியாமல் அடுத்த அரை மணி நேரத்திற்கும் மேலாகப் பெரும் தவிப்பிற்கு உள்ளாகினர். இந்தச் சூழலில், சிக்னல் விழுவதற்கு இப்பகுதியில் எவ்வித முகாந்திரமும் இல்லை என்பதைத் தனது அனுபவத்தின் மூலம் யூகித்த ரயில் ஓட்டுநர், உடனடியாக ரயிலை விட்டு கீழே இறங்கி சிக்னல் கம்பம் அமைந்திருந்த இடத்திற்கு நேரில் நடந்து சென்றார்.
அங்கு ஆட்டோமேட்டிக் அமைப்பில் கோளாறு ஏற்பட்டுள்ளதை உறுதி செய்த அவர், கட்டுப்பாட்டு அறை அதிகாரிகளுக்குத் தகவல் கொடுத்து, அவர்களின் அனுமதியோடு மேனுவல் (Manual) முறையில் சிக்னல் கோளாறைத் துரிதமாகச் சரிசெய்தார். ஓட்டுநரின் இந்தச் சாதுரியமான மற்றும் துரிதமான செயலால், அரை மணி நேரத் தாமதத்திற்குப் பிறகு குருவாயூர் எக்ஸ்பிரஸ் ரயில் மீண்டும் பாக்கம் பகுதியிலிருந்து பாதுகாப்பாகப் புறப்பட்டுச் சென்றது. ரயில்வே தொழில்நுட்ப ஊழியர்கள் வரும் வரை காத்திருக்காமல், ஓட்டுநரே நேரடியாகக் களமிறங்கி சிக்னலைச் சரிசெய்த இந்த சுவாரசியமான அதிரடிச் செயல் தற்போது பயணிகள் மற்றும் ரயில்வே வட்டாரத்தில் பெரும் பாராட்டைப் பெற்று வருகிறது.
