இங்கிலாந்தைச் சேர்ந்த வர்கீ பவுண்டேஷன் வழங்கும் “Global Schools Prize 2026” விருதிற்கான இறுதிப்பட்டியலில் இந்தியாவின் இரண்டு பள்ளிகள் இடம்பிடித்துள்ளன. உலகளவில் கல்வித் துறையில் புதுமை மற்றும் சமூக தாக்கத்தை ஏற்படுத்தும் பள்ளிகளை கௌரவிக்கும் முக்கிய விருதாக இது கருதப்படுகிறது.
இந்த விருதின் கீழ் வெற்றி பெறும் பள்ளிக்கு ஒரு மில்லியன் அமெரிக்க டாலர் பரிசுத்தொகை வழங்கப்படுகிறது. உலகின் எதிர்கால கல்வியை புதுமையான முறையில் மாற்றி அமைக்கும் திறன் கொண்ட பள்ளிகளை தேர்வு செய்வதே இந்த விருதின் நோக்கமாகும். கல்வி, சுற்றுச்சூழல், புதுமை, கலை மற்றும் கலாச்சாரம் உள்ளிட்ட 10 பிரிவுகளின் கீழ் பள்ளிகள் மதிப்பீடு செய்யப்படுகின்றன.
இந்த ஆண்டுக்கான போட்டியில் 113 நாடுகளில் இருந்து சுமார் 3,000 பள்ளிகள் பரிந்துரைக்கப்பட்டன. கடுமையான மதிப்பீட்டு செயல்முறைக்குப் பிறகு, 50 பள்ளிகள் இறுதிப்பட்டியலுக்கு தேர்வு செய்யப்பட்டுள்ளன. இதில் இந்தியாவைச் சேர்ந்த இரண்டு பள்ளிகள் இடம்பெற்றிருப்பது பெருமைக்குரிய விஷயமாகும்.
டெல்லியில் செயல்படும் கத்தா லேப் ஸ்கூல் கலை மற்றும் கலாச்சாரப் பிரிவில் தேர்வு செய்யப்பட்டுள்ளது. மேலும், டெல்லி பப்ளிக் ஸ்கூல் பெங்களூர் நார்த் கல்வி பிரிவில் இடம்பிடித்துள்ளது. இந்த சாதனை இந்திய கல்வித்துறையின் வளர்ச்சியையும், புதுமையான கற்றல் முறைகளின் முன்னேற்றத்தையும் வெளிப்படுத்துகிறது.
இந்த இரண்டு பள்ளிகளுக்கும் சன்னி வர்கீ வாழ்த்துகளை தெரிவித்தார். உலகளவில் இந்திய பள்ளிகள் முன்னிலை வகித்து வருவதை இந்த தேர்வு மீண்டும் உறுதிப்படுத்துகிறது. இறுதி முடிவுகள் வெளியாகும் நிலையில், இந்த பள்ளிகள் வெற்றி பெறும் என்ற எதிர்பார்ப்பு அதிகரித்துள்ளது.
