ஐந்து மாநிலச் சட்டமன்றத் தேர்தல் முடிவுகள் வெளியான சில நாட்களிலேயே, பெட்ரோல் மற்றும் டீசல் விலையை லிட்டருக்கு 3 ரூபாய் வரை உயர்த்தியுள்ள பொதுத்துறை எண்ணெய் நிறுவனங்களின் நடவடிக்கைக்குத் தமிழக முதலமைச்சர் சி. ஜோசப் விஜய் கடும் கண்டனம் தெரிவித்துள்ளார். இந்த விலை உயர்வு ஏழை மற்றும் நடுத்தர மக்களின் வாழ்வாதாரத்தை நிலைகுலையச் செய்யும் என அவர் தனது அறிக்கையில் சுட்டிக்காட்டியுள்ளார்.
“மத்திய பொதுத்துறை எண்ணெய் நிறுவனங்கள் பெட்ரோல் மற்றும் டீசல் விலையை லிட்டருக்கு 3 ரூபாய் வரை உயர்த்தியிருப்பது மிகுந்த வேதனை அளிக்கிறது. தேர்தல் காலங்களில் விலையை உயர்த்தாமல் இருந்துவிட்டு, வாக்குப்பதிவு முடிந்தவுடன் இத்தகைய அதிரடி விலை உயர்வை அறிவிப்பது எந்த விதத்திலும் ஏற்றுக்கொள்ள முடியாதது. இது மக்களை வஞ்சிக்கும் செயலாகும்,” என முதல்வர் தெரிவித்துள்ளார்.
டீசல் விலை உயர்வால் சரக்கு போக்குவரத்துச் செலவு அதிகரிக்கும் என்பதைக் குறிப்பிட்டுள்ள அவர், “இதனால் காய்கறிகள், மளிகைப் பொருட்கள் உள்ளிட்ட அத்தியாவசியப் பொருட்களின் விலை உயர்ந்து, சாமானிய மக்களின் பட்ஜெட்டைச் சிதைக்கும். குறிப்பாக, வங்கிக் கடன் பெற்று வாகனங்களை இயக்கும் ஓட்டுநர்கள் மற்றும் வாடகை வாகன உரிமையாளர்கள் பெரும் நிதி நெருக்கடிக்கு உள்ளாவார்கள்,” என்று எச்சரித்துள்ளார்.
தமிழகத்தின் பொருளாதாரத் தூண்களாகத் திகழும் குறு, சிறு மற்றும் நடுத்தரத் தொழில் நிறுவனங்கள் (MSMEs) ஏற்கனவே பல்வேறு சவால்களைச் சந்தித்து வரும் நிலையில், இந்த எரிபொருள் விலை உயர்வு உற்பத்திச் செலவை மேலும் அதிகரிக்கும். இது சந்தையில் தேக்க நிலையை உருவாக்கி, ஏற்றுமதியையும் பாதிக்கும் என முதல்வர் கவலை தெரிவித்துள்ளார்.
“இருசக்கர வாகனங்களைப் பயன்படுத்தும் நடுத்தர வர்க்கத்தினர் முதல் சிறு தொழில்துறையினர் வரை அனைவரையும் பாதிக்கும் இந்தத் தவறான முடிவை மத்திய அரசு உடனடியாகத் திரும்பப் பெற வேண்டும். பெட்ரோலியப் பொருட்களின் விலையைச் சீராகப் பராமரிப்பதன் மூலம் மட்டுமே பணவீக்கத்தைக் கட்டுப்படுத்த முடியும்,” என முதலமைச்சர் விஜய் தனது அறிக்கையில் வலியுறுத்தியுள்ளார்.
தமிழக முதல்வர் விடுத்துள்ள இந்தக் கண்டன அறிக்கை, பெட்ரோல் விலை உயர்வால் அதிருப்தியில் உள்ள மக்களிடையே பெரும் வரவேற்பைப் பெற்றுள்ளது.
