செங்கல்பட்டு மாவட்டத்தில் பொதுமக்களின் தேவைகளை விரைவாக நிறைவேற்றும் வகையில் நடத்தப்பட்ட ரேஷன் கார்டு திருத்த சிறப்பு முகாமில் 112 மனுக்களுக்கு உடனடியாக தீர்வு காணப்பட்டதாக அதிகாரிகள் தெரிவித்துள்ளனர்.
செங்கல்பட்டு மாவட்டத்தில் உள்ள செங்கல்பட்டு, மதுராந்தகம், செய்யூர், திருக்கழுக்குன்றம், திருப்போரூர் மற்றும் வண்டலூர் தாலுகாக்களைச் சேர்ந்த பொதுமக்கள் பயன்பெறும் வகையில் பல்வேறு இடங்களில் இந்த சிறப்பு முகாம் நேற்று நடைபெற்றது.
ஆத்தூர், மாம்பாக்கம், வடக்கு செய்யூர், சதுரங்கப்பட்டினம், கேளம்பாக்கம் மற்றும் மேலக்கோட்டையூர் உள்ளிட்ட பகுதிகளில் அமைக்கப்பட்ட முகாம்களில் பொதுமக்கள் அதிக அளவில் பங்கேற்றனர். ரேஷன் கார்டில் பெயர் சேர்த்தல், பெயர் நீக்கம், முகவரி மாற்றம், மொபைல் எண் புதுப்பித்தல் உள்ளிட்ட பல்வேறு சேவைகளுக்காக மக்கள் மனுக்கள் அளித்தனர்.
மொத்தமாக 112 மனுக்கள் பெறப்பட்டதாகவும், அவற்றை அந்தந்த தாலுகா வட்ட வழங்கல் அலுவலர்கள் உடனுக்குடன் பரிசீலனை செய்து தீர்வு வழங்கியதாகவும் கூறப்பட்டுள்ளது. இதனால் பொதுமக்கள் அலுவலகங்களுக்கு பலமுறை அலைந்து திரிய வேண்டிய அவசியம் குறைந்துள்ளதாக மக்கள் தெரிவித்தனர்.
இத்தகைய சிறப்பு முகாம்கள் மூலம் மக்கள் சேவைகள் விரைவாக வழங்கப்படுவது பாராட்டுக்குரியது என்றும், இதுபோன்ற முகாம்களை தொடர்ந்து நடத்த வேண்டும் என்றும் பொதுமக்கள் கோரிக்கை விடுத்துள்ளனர்.
