செங்கல்பட்டு மாவட்டத்தில் போதைப்பொருள் மற்றும் கள்ளச்சாராய விற்பனையை முற்றிலும் கட்டுப்படுத்தும் நோக்கில் மாவட்ட நிர்வாகம் தீவிர நடவடிக்கைகளை மேற்கொண்டு வருகிறது. இதற்காக மாவட்ட ஆட்சியர் எஸ். மாலதி ஹெலன் முக்கிய உத்தரவுகளை பிறப்பித்துள்ளார்.
பள்ளி, கல்லூரி, மாணவர் விடுதிகள், பேருந்து நிலையங்கள், ரயில் நிலையங்கள் மற்றும் முக்கிய போக்குவரத்து மையங்கள் உள்ளிட்ட பகுதிகளில் அதிகாரிகள் தீவிர சோதனையில் ஈடுபட வேண்டும் என்று அறிவுறுத்தப்பட்டுள்ளது. குறிப்பாக இளைஞர்கள் மற்றும் மாணவர்களை குறிவைத்து நடைபெறும் போதைப்பொருள் விற்பனையை தடுக்க சிறப்பு கண்காணிப்பு மேற்கொள்ள உத்தரவிடப்பட்டுள்ளது.
மேலும் டாஸ்மாக் கடைகள், பார்கள், சட்டவிரோத மதுக்கூடங்கள் மற்றும் சிறுகடைகளில் திடீர் ஆய்வுகள் நடத்தவும் அதிகாரிகளுக்கு அறிவுறுத்தப்பட்டுள்ளது. விதிமுறைகளை மீறி செயல்படும் கடைகள் மீது கடுமையான நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.
போதைப்பொருள் மற்றும் கள்ளச்சாராய விற்பனை காரணமாக சமூகத்தில் பல்வேறு பிரச்சினைகள் உருவாகி வரும் நிலையில், மாவட்ட நிர்வாகத்தின் இந்த நடவடிக்கை பொதுமக்களிடையே வரவேற்பைப் பெற்றுள்ளது. குறிப்பாக பள்ளி மற்றும் கல்லூரி மாணவர்களை பாதுகாக்க தொடர்ந்து கண்காணிப்பு தேவை என சமூக ஆர்வலர்களும் வலியுறுத்தியுள்ளனர்.
