தமிழகச் சட்டமன்றத் தேர்தல் முடிவுகள் எவராலும் கணிக்க முடியாத மாபெரும் அரசியல் திருப்பங்களைச் சென்னை மண்ணில் நிகழ்த்தியுள்ளன. திராவிட முன்னேற்றக் கழகத்தின் அசைக்க முடியாத கோட்டையாகக் கருதப்பட்ட கொளத்தூரில் முதலமைச்சர் மு.க. ஸ்டாலின் தோல்வியைத் தழுவியுள்ள அதே வேளையில், சேப்பாக்கம்-திருவல்லிக்கேணி தொகுதியில் அவரது மகன் உதயநிதி ஸ்டாலின் தனது வெற்றியைப் பதிவு செய்துள்ளார்.
தமிழக அரசியலையே உலுக்கும் வகையில், முதலமைச்சர் மு.க. ஸ்டாலின் தனது சொந்தத் தொகுதியான கொளத்தூரில் தோல்வியடைந்துள்ளார். தமிழக வெற்றிக் கழகத்தின் வேட்பாளர் வி.எஸ்.பாபு, தொடக்கத்திலிருந்தே முன்னிலை வகித்து வந்த நிலையில், இறுதியில் முதலமைச்சர் ஸ்டாலினைத் தோற்கடித்து வரலாற்றுச் சாதனையைப் படைத்துள்ளார்.
16-வது சுற்று முடிவிலேயே சுமார் 7,700 வாக்குகள் வித்தியாசத்தில் பின்னடைவைச் சந்தித்த முதல்வர் ஸ்டாலினால், அடுத்தடுத்த சுற்றுகளில் அந்த இடைவெளியைக் குறைக்க முடியவில்லை. ஆளும் கட்சி முதலமைச்சர் ஒருவர் தனது தொகுதியிலேயே தோல்வியடைவது திமுக முகாமில் பேரதிர்ச்சியை ஏற்படுத்தியுள்ளது.
தந்தை தோல்வியடைந்த போதிலும், உதயநிதி ஸ்டாலின் சேப்பாக்கம்-திருவல்லிக்கேணி தொகுதியில் தனது வெற்றியை உறுதி செய்துள்ளார். கடும் போட்டிகளுக்கு இடையே உதயநிதி ஸ்டாலின் மீண்டும் சட்டமன்ற உறுப்பினராகத் தேர்ந்தெடுக்கப்பட்டுள்ளார்.
திமுக-வின் ஆறுதல்: சென்னையில் அமைச்சர்கள் சேகர்பாபு போன்றோர் வெற்றி பெற்றுள்ள நிலையில், உதயநிதியின் இந்த வெற்றி திமுக-விற்குச் சிறு ஆறுதலைத் தந்துள்ளதாகக் கருதப்படுகிறது.
தமிழகம் முழுவதும் 108-க்கும் மேற்பட்ட தொகுதிகளில் தவெக வெற்றி பெற்றுள்ள நிலையில், கொளத்தூர் போன்ற முக்கியத் தொகுதிகளில் கிடைத்துள்ள வெற்றி விஜய்யின் அரசியல் ஆளுமையை நிரூபித்துள்ளது. “எவராலும் விஜய் ஆக முடியாது” என்று நடிகர் சிபி சத்யராஜ் குறிப்பிட்டது போல, விஜய்யின் தவெக தமிழக அரசியலில் ஒரு புதிய சகாப்தத்தைத் தொடங்கியுள்ளது. விஜய்யின் இந்த வரலாற்றுச் சிறப்புமிக்க வெற்றிக்கு ராகுல் காந்தி ஏற்கனவே தொலைபேசி வாயிலாக வாழ்த்துத் தெரிவித்துள்ளார்.
