சிங்கப்பெருமாள் கோவில் அருகே சென்னை – திருச்சி தேசிய நெடுஞ்சாலையில் கார் மோதி மாடு ஒன்று உயிரிழந்த சம்பவம் அப்பகுதியில் பரபரப்பை ஏற்படுத்தியுள்ளது.
செங்கல்பட்டு மாவட்டம் சிங்கப்பெருமாள் கோவில் அருகே சென்னை – திருச்சி தேசிய நெடுஞ்சாலையில் இன்று நிகழ்ந்த சாலை விபத்தில் மாடு ஒன்று சம்பவ இடத்திலேயே உயிரிழந்தது. கால்நடைகள் அடிக்கடி குறுக்கிடுவதால் வாகன ஓட்டிகளின் பாதுகாப்பு கேள்விக்குறியாகி வருவதாக அப்பகுதி மக்கள் வேதனை தெரிவித்துள்ளனர்.
சென்னையிலிருந்து செங்கல்பட்டு நோக்கிக் கார் ஒன்று இன்று அதிவேகமாகச் சென்று கொண்டிருந்தது. சிங்கப்பெருமாள் கோவில் பகுதியை அந்தக் கார் கடந்தபோது, எதிர்பாராத விதமாக மாடு ஒன்று திடீரெனச் சாலையின் குறுக்கே கடக்க முயன்றது. ஓட்டுநர் காரை நிறுத்த முயன்றும், கட்டுப்பாட்டை இழந்த கார் மாட்டின் மீது பலமாக மோதியது. இந்த விபத்தின் கோரத்தினால் மாடு தூக்கி வீசப்பட்டு சம்பவ இடத்திலேயே பரிதாபமாக உயிரிழந்தது.
இது குறித்து தகவல் அறிந்த மகேந்திரா சிட்டி தீயணைப்புத் துறை வீரர்கள் உடனடியாகச் சம்பவ இடத்திற்கு விரைந்து வந்து, சாலையில் கிடந்த மாட்டின் உடலை மீட்டனர். இந்த விபத்து காரணமாகச் சென்னை – திருச்சி தேசிய நெடுஞ்சாலையில் சிறிது நேரம் கடும் போக்குவரத்து நெரிசல் ஏற்பட்டது. பாதுகாப்புப் பணியில் ஈடுபட்டிருந்த போலீசார், விபத்துக்குள்ளான காரை அப்புறப்படுத்திப் போக்குவரத்தை விரைந்து சீர் செய்தனர்.
தேசிய நெடுஞ்சாலைகளில் கால்நடைகள் எவ்விதக் கட்டுப்பாடுமின்றி உலா வருவதால் வாகன ஓட்டிகள் பெரும் சிரமத்திற்கு உள்ளாவதோடு, இத்தகைய விபத்துகள் தொடர்கதையாகி வருவதாகவும், கால்நடை உரிமையாளர்கள் மீது கடும் நடவடிக்கை எடுக்க வேண்டும் என்றும் சமூக ஆர்வலர்கள் கோரிக்கை விடுத்துள்ளனர்.
