இந்திய நாடாளுமன்ற வரலாற்றில் இன்று ஒரு முக்கியத் திருப்பம் ஏற்பட்டுள்ளது. மத்திய அரசு கொண்டு வந்த மிக முக்கியமான 131-வது அரசியலமைப்புச் சட்டத்திருத்த மசோதா (மகளிர் இடஒதுக்கீடு மற்றும் தொகுதி மறுசீரமைப்பு), மக்களவையில் போதிய ஆதரவு கிடைக்காததால் தோல்வியடைந்தது. அரசியலமைப்புச் சட்டத்தைத் திருத்துவதற்குத் தேவையான மூன்றில் இரண்டு பங்கு (2/3) பெரும்பான்மையை ஆளும் தரப்பால் எட்ட முடியாததே இந்தத் தோல்விக்குக் காரணமாக அமைந்தது.விவாதம் மற்றும் வாக்கெடுப்பு விவரங்கள்நேற்று தாக்கல் செய்யப்பட்ட இந்த மசோதாக்கள் மீது சுமார் 12 மணி நேரத்திற்கும் மேலாக அனல் பறக்கும் விவாதம் நடைபெற்றது.
பிரதமர் நரேந்திர மோடி, மத்திய அமைச்சர் அமித் ஷா மற்றும் எதிர்க்கட்சித் தலைவர் ராகுல் காந்தி உள்ளிட்டோர் தங்களது வாதங்களை முன்வைத்தனர்.மகளிர் இடஒதுக்கீட்டை எதிர்க்கட்சிகள் வரவேற்ற போதிலும், அதனுடன் இணைக்கப்பட்ட தொகுதி மறுசீரமைப்பு மசோதாவிற்குத் தென் மாநிலக் கட்சிகள் மற்றும் காங்கிரஸ் உள்ளிட்ட கூட்டணிக் கட்சிகள் கடும் எதிர்ப்புத் தெரிவித்தன.
புதிய மக்கள் தொகை கணக்கெடுப்பு நடத்தாமல், 2011 கணக்கெடுப்பை அடிப்படையாக வைத்துத் தொகுதிகளை மறுவரையறை செய்வதை எதிர்க்கட்சிகள் ஏற்க மறுத்துவிட்டன.வாக்கெடுப்பு புள்ளிவிவரங்கள்மக்களவையில் இன்று நடைபெற்ற வாக்கெடுப்பின் இறுதி முடிவுகள் வெளியாகியுள்ளனர்.
விவரம் – எண்ணிக்கை
மக்களவை மொத்த உறுப்பினர்கள் – 543
இன்று அவைக்கு வருகை தந்தவர்கள் – 489
ஆதரவாகப் பதிவான வாக்குகள் – 298
எதிராகப் பதிவான வாக்குகள் – 230
வெற்றி பெறத் தேவைப்பட்ட வாக்குகள் – 326
குறைந்த வாக்குகளின் எண்ணிக்கை – 28
அரசியலமைப்புச் சட்டத் திருத்தம் என்பதால், அவைக்கு வந்தவர்களில் 66.6% (மூன்றில் இரண்டு பங்கு) ஆதரவு என்பது கட்டாய விதியாகும். 489 உறுப்பினர்கள் பங்கேற்ற இன்றைய வாக்கெடுப்பில், அரசுக்கு ஆதரவாக 298 வாக்குகள் மட்டுமே கிடைத்தன. இது தேவையான எண்ணிக்கையை விட 28 வாக்குகள் குறைவாகும்.
தொகுதி மறுசீரமைப்பிர்கு பலத்த எதிர்ப்பு வந்த நிலையில், தென் மாநிலங்களின் அரசியல் செல்வாக்கைத் தொகுதி மறுசீரமைப்பு சிதைத்துவிடும் என்ற அச்சத்தால் எதிர்க்கட்சிகள் ஓரணியில் திரண்டு மசோதாவைத் தோற்கடித்தன.
மத்திய அரசு பெரும் எதிர்பார்ப்புடன் கொண்டு வந்த இந்த மசோதா தோல்வியடைந்தது, வரும் தேர்தல்களில் முக்கிய விவாதப் பொருளாக மாறும் என எதிர்பார்க்கப்படுகிறது. “எதிர்க்கட்சிகள் மகளிர் முன்னேற்றத்தைத் தடுத்துவிட்டன” என ஆளும் தரப்பும், “தென் மாநிலங்களின் உரிமையைக் காக்கவே மசோதாவை எதிர்த்தோம்” என எதிர்க்கட்சிகளும் காரசாரமான பரப்புரைகளைத் தொடங்கிவிட்டன.
